थुलुङ दूधकोशीमा कफी प्रशोधन प्लान्ट सञ्चालन, स्थानीय कफीको बजार विस्तार

असार २, सोलुखुम्बु । सोलुखुम्बुको थुलुङ दूधकोशी गाउँपालिकामा कफी प्रशोधन प्लान्ट सञ्चालनमा आएको छ । स्थानीय कृषकले उत्पादन गरेको कफीको संकलन तथा प्रशोधनका लागि गाउँपालिका, इको हिमाल र ग्लेशियर ट्रस्टको संयुक्त लगानीमा स्थापना गरिएको कफी प्रशोधन प्लान्ट सञ्चालनमा आएको हो । आर्थिक वर्ष २०८१/८२ मा गाउँपालिकाभित्र २ हजार १ सय ८५ केजी कफी उत्पादन भएको थियो ।

गाउँपालिकाले तोकेको न्यूनतम समर्थन मूल्य प्रतिकेजी ६०० रुपैयाँका दरले कृषक तथा कृषि समूह सहकारीमार्फत कफी खरिद गरेको थियो । प्रशोधनपछि ग्रेड ‘ए’ र ‘बी’ कफी प्रतिकेजी ८०० रुपैयाँका दरले बिक्री वितरण गरिएको गाउँपालिकाले जनाएको छ । कृषि शाखा प्रमुख डिल्लुनाथ योगीका अनुसार थुलुङ दूधकोशीमा उत्पादन भएको कफी हाल काठमाडौं र सल्लेरीका विभिन्न क्याफेमा बिक्री वितरण भइरहेको छ ।

उहाँले स्थानीय कफीको माग बढ्दै गएको र बजार विस्तारमा सकारात्मक परिणाम देखिएको बताउनुभयो । योगीका अनुसार गत आर्थिक वर्ष २०८१/८२ मा द हिमालयन ट्रस्टमार्फत बेलायतमा परीक्षणका लागि पठाइएको कफीको गुणस्तर परीक्षणमा ८३ प्रतिशत शुद्धता प्राप्त भएको थियो । उक्त नतिजाले यहाँ उत्पादन हुने कफी अन्तर्राष्ट्रिय बजारका लागि समेत सम्भावना बोकेको पुष्टि गरेको उहाँको भनाइ छ ।

यसैबीच कफी प्रशोधन प्रक्रिया, उत्पादनको गुणस्तर तथा हालको अवस्थाबारे जानकारी लिन कृषि विकास निर्देशनालय विराटनगर र कृषि ज्ञान केन्द्र सोलुखुम्बुका कर्मचारी प्रतिनिधिहरूले प्रशोधन प्लान्टको स्थलगत अनुगमन गरेका छन् । अनुगमन टोलीले कफी उत्पादनदेखि प्रशोधन र बजारीकरणसम्मका गतिविधिबारे जानकारी लिँदै स्थानीय कफी क्षेत्रको विकासका सम्भावनाबारे छलफल समेत गरेको जनाएको छ ।