लिखु जलविद्युत् आयोजनाविरुद्ध आठौँ दिनसम्म आन्दोलन, स्थानीय आक्रोश चुलिँदै

असार २, सोलुखुम्बु । सोलुखुम्बुको लिखुपिके गाउँपालिका र रामेछापको उमाकुण्ड गाउँपालिकाको सीमास्थित लिखु नदीमा निर्माणाधीन लिखु–१, लिखु–२ र लिखु–ए जलविद्युत् आयोजनाबाट प्रभावित स्थानीय बासिन्दाहरूको आन्दोलन लगातार आठौँ दिनसम्म जारी रहेको छ। स्थानीय संघर्ष समितिका अनुसार आयोजनाबाट प्रत्यक्ष प्रभावित समुदायले आफ्नो जीवनयापन, प्राकृतिक स्रोतसाधन र स्थानीय वातावरणमा परेको असरबारे उठाउँदै आएका मागहरू पटक–पटक वार्ता भए पनि कार्यान्वयन नभएको भन्दै पुनः सडक आन्दोलनमा उत्रिन बाध्य भएका हुन्।

संघर्ष समितिका संयोजक गेल्वु शेर्पाले विगतमा कम्पनी र स्थानीय पक्षबीच भएका सम्झौताहरू व्यवहारमा लागू नभएकाले विश्वासको संकट गहिरिँदै गएको बताएका छन्। आन्दोलनरत पक्षले शान्तिपूर्ण विरोध कार्यक्रम जारी राख्दै आए पनि हालैको घटनाक्रमसँगै आन्दोलन थप कडा बन्दै गएको देखिएको छ। स्थानीयवासीहरूले आज एक जलविद्युत् आयोजनाको सुरुङतर्फ मोडिएको पानी खोलामा फर्काइदिएर सांकेतिक विरोध जनाएका छन्।

उनीहरूले यसलाई केवल सुरुवाती कदम भएको भन्दै, माग सम्बोधन नभए अन्य आयोजनामा पनि यस्तै प्रकारको अवरोध गर्ने चेतावनी दिएका छन्। संघर्ष समितिले कम्पनीले तल्लो तहका कर्मचारीमार्फत गरिने सामान्य संवादले समस्या समाधान नहुने बताउँदै उच्चस्तरीय निर्णय क्षमता भएका पक्षहरूबीच मात्र औपचारिक वार्ता हुनुपर्ने अडान राखेको छ। समितिका अनुसार विगतका अनुभव दोहोरिन नदिन अबको सहमति कागजमै सीमित नभई पूर्ण रूपमा कार्यान्वयन हुने सुनिश्चितता आवश्यक छ।

समितिले प्रस्ताव गरेको वार्तामा पाँच पक्षको अनिवार्य सहभागिता हुनुपर्ने माग गरिएको छ। जसअनुसार आयोजनाका मुख्य प्रवर्द्धक, रामेछाप र सोलुखुम्बु दुवै जिल्लाका संघीय सांसदहरू, दुवै जिल्लाका प्रमुख जिल्ला अधिकारीहरू, उमाकुण्ड र लिखुपिके गाउँपालिकाका जनप्रतिनिधिहरू तथा संघर्ष समितिका प्रतिनिधिहरू एउटै टेबलमा बसेर समाधान खोजिनुपर्ने उनीहरूको भनाइ छ।