बराहपोखरीको प्रशासनिक भवन ः ४३ महिनामा ८५ प्रतिशत भौतिक प्रगती

जेठ २९, सोलुखुम्बु । बराहपोखरी गाउँपालिका खोटाङको प्रशासनिक भवन निर्माणको भौतिक प्रगती ४३ महिना वितिसक्दा ८५ प्रतिशत मात्र सकिएको छ । बराहपोखरी गाउँपालिकाको केन्द्र धर्तुङमा निर्माण भइरहेको गाउँपालिका प्रशासनिक भवन निर्माणको काम झण्डै ४ वर्ष वितिसक्दा पनि नसकिएको हो ।

निर्माण कम्पनी कौशील बस्नेत निर्माण सेवा काठमाण्डौ महानगरपालिका वडा नम्बर १० नयाँ बानेश्वरले निर्माण गरिरहेको प्रशासनिक भवन तेश्रो पटक म्याद गुज्रिनै लाग्दा पनि काम सकिएको छैन । संघिय सरकारको ६० प्रतिशत र नेपाल सरकारको ६० प्रतिशत लागतमा निर्माण भइरहेको प्रशासनिक भवन निर्माण संघीय सरकारबाट आउनु पर्ने सबै बजेट प्राप्त नहुँदा निर्माण कार्य सम्पन्न गर्नमा कठिनाई भइरहेका पालिकाले जनाएको छ ।

५ करोड ६९ लाख ७० हजार ३ सय ९२ रुपैयाँमा २०७७ साल कार्तिक ७ गते ठेक्का सम्झौता भएको पालिका भवन निर्माणको काम २०७९ बैशाख मा सम्पन्न गर्नुपर्ने थियो । पहिलो पटक १८ महिनाको मिति गुजारेको निर्माण कम्पनीले दोश्रो पटक फेरी ९ म्याद थप गरेर २०७९ माघमा सक्ने गरि सम्झौता गरेको थियो ।

तर दोश्रो पटक थप गरेको म्याद समेत गुजारेपछि अहिले २०८१ असार २० गते सक्ने गरि तेश्रो पटक म्याद थप गरेर काम भइरहेको छ । भौतिक प्रगती ८५ प्रतिशत भएको भवन निर्माण कम्पनीको कामको वित्तिय प्रगती ७५ प्रतिशतमात्र छ । संघिय सरकारबाट प्राप्त हुनुपर्ने रकम समयमा प्राप्त नहुँदा भवन निर्माणमा ढिलासुस्ती भइरहेको गाउँपालिकाका लेखा अधिकृत छत्र बहादुर बानियाँले जानकारी दिनुभयो । हाल सम्म गाउँपालिकाले निर्माण कम्पनीलाई ४ करोड १६ लाख ८७ हजार ८ सय ६७ रुपैयाँ भुक्तानी गरिसकेको छ ।