सोलुमा प्रहरी हवल्दार बोधबहादुर बानियाँ ‘जेठ महिनाको उत्कृष्ट प्रहरी’ घोषित

सबिना राई, असार ३, सोलुखुम्बु । जिल्ला प्रहरी कार्यालय सोलुखुम्बुले प्रहरी चौकी रामपुरझिल्के उदयपुर दरबन्दी भई हाल कार्यालयमा कार्यरत प्रहरी हवल्दार बोधबहादुर बानियाँलाई जेठ महिनाको उत्कृष्ट प्रहरी घोषणा गरेको छ । वैदेशिक रोजगार ठगी तथा बैंकिङ कसूर मुद्दाका फरार प्रतिवादीहरूलाई पक्राउ गरी फैसला कार्यान्वयनमा उल्लेखनीय योगदान पुर्याएका प्रहरी हवल्दार बानियाँलाई ‘२०८३ साल जेठ महिनाको उत्कृष्ट प्रहरी’ घोषणा गरिएको हो ।

फरार प्रतिवादीहरूको खोजतलास तथा पक्राउमा प्रभावकारी नेतृत्व र सक्रिय भूमिका निर्वाह गर्दै कानुनी शासनको प्रत्याभूति दिलाउन योगदान पुर्याएको भन्दै उहाँलाई उक्त सम्मान प्रदान गरिएको जिल्ला प्रहरी कार्यालय सोलुखुम्बुले जनाएको छ । बानियाँले २०८३ जेठ ९ गते जिल्ला अदालत सोलुखुम्बुद्वारा वैदेशिक रोजगार ठगी मुद्दामा दुई वर्ष कैद र दुई लाख रुपैयाँ जरिवाना ठहर भई फरार रहेका सोलुदुधकुण्ड नगरपालिका–११ तिङलाका ५३ वर्षीय लालबहादुर कार्कीलाई काठमाडौंमा लुकीछिपी बसेको अवस्थामा पक्राउ गरेका थिए ।

त्यसैगरी जेठ २१ गते वैदेशिक रोजगार ठगी र बैंकिङ कसूर मुद्दामा चार वर्ष ६ महिना एक दिन कैद तथा ३६ लाख ९५ हजार रुपैयाँ जरिवाना, बिगो र क्षतिपूर्ति ठहर भई फरार रहेका सोही स्थानका नारायणकुमार खड्कालाई काठमाडौं महानगर क्षेत्रबाट पक्राउ गर्न पनि उहाँले महत्वपूर्ण भूमिका खेलेका थिए ।

फरार अभियुक्तहरूलाई पक्राउ गरी फैसला कार्यान्वयनमा सहयोग पुर्याउनुका साथै आम नागरिकमा शान्ति सुरक्षाको अनुभूति गराउने र प्रहरी संगठनको छवि उच्च बनाउन प्रशंसनीय कार्य गरेको मूल्याङ्कन गर्दै बानियाँलाई उत्कृष्ट प्रहरी घोषणा गरिएको जनाइएको छ । कार्यालयका अनुसार उनले विभागीय आदेश, निर्देशन र आचारसंहिताको पूर्ण पालना गर्दै उच्च मनोबल, लगनशीलता तथा कर्तव्यनिष्ठाका साथ जिम्मेवारी निर्वाह गर्दै आउनुभएको छ ।