तामाखानी नगरपालिकाकै दोस्रो बालमैत्री वडा घोषित

सोलुखुम्बु, असार ३ । सोलुखुम्बुको सोलुदुधकुण्ड नगरपालिका वडा नम्बर ३ तामाखानीलाई बालमैत्री वडा घोषणा गरिएको छ । बुधबार एक विशेष कार्यक्रममा वडालाई बालश्रममुक्त, हिंसारहित, बालविवाह निषेधित तथा बालमैत्री स्थानीय शासनयुक्त वडा घोषणा गरिएको हो । स्थानीय तहमा बालअधिकारको सुनिश्चितता गर्दै बालबालिकामैत्री वातावरण निर्माण गर्ने उद्देश्यका साथ वडा घोषणा गरिएको जनाइएको छ ।

यससँगै तामाखानी सोलुदुधकुण्ड नगरपालिकाको दोस्रो बालमैत्री वडा बनेको छ । सरकारद्वारा जारी बालमैत्री स्थानीय शासन कार्यान्वयन निर्देशिकामा उल्लेखित ५२ वटा सूचक पूरा गरेपछि वडालाई बालमैत्री स्थानीय शासनयुक्त वडा घोषणा गरिएको वडा अध्यक्ष लाक्पा गेलु शेर्पाले जानकारी दिनुभयो। “बालबालिकामा लगानी सबैको सरोकार, बालमैत्री नगर, विकास र समृद्धिको आधार” भन्ने मूल नारासहित वडा कार्यालयले औपचारिक कार्यक्रम आयोजना गरी घोषणा सम्पन्न गरेको जनाएको छ।

कार्यक्रमका प्रमुख अतिथि तथा नगर प्रमुख नाम्गेल जाङ्बु शेर्पाले बालअधिकारको संरक्षण र सुनिश्चितताका लागि नगरपालिका सदैव प्रतिबद्ध रहेको बताउनुभयो। उहाँले बालमैत्री स्थानीय शासनले बालबालिकाको समग्र विकासमा महत्वपूर्ण योगदान पु¥याउने विश्वास व्यक्त गर्नुभयो।

वडा अध्यक्ष लाक्पा गेलु शेर्पाको अध्यक्षतामा सम्पन्न कार्यक्रममा जिल्ला समन्वय समितिकी उपप्रमुख टिका माया मगर, नगर प्रवक्ता तथा वडा नं. ६ का अध्यक्ष फुर्वा ग्याल्जेन शेर्पा, वडा अध्यक्षहरू सोनाम ग्याल्जेन शेर्पा र ङवाङ ठिले शेर्पा, प्रमुख प्रशासकीय अधिकृत सुरेन्द्र थापा लगायत विभिन्न सरोकारवाला निकायका प्रतिनिधिहरूको सहभागिता रहेको थियो। कार्यक्रम पिके माध्यमिक विद्यालय, लोदिङमा सम्पन्न भएको वडा कार्यालयले जनाएको छ।