उज्यालो नेपाल पार्टीको सोलुखुम्बु निर्वाचन क्षेत्र इन्चार्जको जिम्मेवारी पेम्बा छिरी शेर्पालाई

सबिना राई, असार ४, सोलुखुम्बु । उज्यालो नेपाल पार्टीले सोलुखुम्बु निर्वाचन क्षेत्रको इन्चार्जको जिम्मेवारी पेम्बा छिरी शेर्पालाई सुम्पेको छ । पार्टीका केन्द्रीय अध्यक्ष कुलमान घिसिङद्वारा हस्ताक्षरित पत्रमार्फत शेर्पालाई सो जिम्मेवारी प्रदान गरिएको हो । पार्टीको नीति, सिद्धान्त, विचार र जनमुखी अभियानलाई सोलुखुम्बु निर्वाचन क्षेत्रभित्र पर्ने सम्पूर्ण पालिका, वडा तथा टोल तहसम्म विस्तार गर्ने उद्देश्यले शेर्पालाई सो जिम्मेवारी दिइएको पत्रमा उल्लेख छ ।

यसअघि २०८२ सालको निर्वाचनमा सोलुखुम्बु निर्वाचन क्षेत्रबाट उज्यालो नेपाल पार्टीको उम्मेदवारका रूपमा शेर्पाले निर्वाह गरेको भूमिका, जनसम्पर्क, सक्रियता तथा पार्टीप्रतिको प्रतिबद्धताको उच्च मूल्यांकन गर्दै पार्टीले उनलाई संगठन निर्माण, विस्तार र सुदृढीकरणका लागि यो विशेष जिम्मेवारी सुम्पेको हो ।

नवनियुक्त इन्चार्ज शेर्पाले सोलुखुम्बु निर्वाचन क्षेत्रभित्र पर्ने स्थानीय तहहरूमा पार्टीको संगठन विस्तार गर्ने, स्थानीय नागरिकसँग प्रत्यक्ष संवाद गर्ने, सक्रिय सदस्य तथा समर्थकहरूको विवरण संकलन गर्ने जिम्मेवारी पाएका छन्। यसका साथै, पार्टीको नीति तथा कार्यक्रम जनतासमक्ष पुर्याउने र स्थानीय समस्या तथा जनगुनासो संकलन गरी पार्टी केन्द्रीय कार्यालयमा नियमित प्रतिवेदन पेस गर्नुपर्ने जिम्मेवारी समेत उनलाई तोकिएको छ ।

उज्यालो नेपाल पार्टी सुशासन, समृद्धि, सामाजिक न्याय, जनसेवा र परिवर्तनको पक्षमा दृढतापूर्वक उभिएको उल्लेख गर्दै अध्यक्ष घिसिङले शेर्पाले आफ्नो जिम्मेवारी इमानदारी, सक्रियता र जनउत्तरदायी भावनाका साथ पूरा गर्ने विश्वास व्यक्त गर्नुभएको छ । साथै, संगठन विस्तारसम्बन्धी प्रारम्भिक प्रगति प्रतिवेदन आगामी २०८३ असार १५ गतेभित्र पार्टी केन्द्रीय कार्यालयमा पेस गर्न निर्देशन समेत दिइएको छ ।