लुक्ला मोटर बाटोको शिलान्यास, पर्यटन र स्थानीय जनजीवनमा नयाँ आशा

असार ४, सोलुखुम्बु । खुम्बु पासाङल्हामु गाउँपालिकाको लुक्ला क्षेत्रमा मोटर बाटो निर्माण कार्यको शलान्यास गरिएको छ । लामो समयदेखि सडक पहुँचको प्रतीक्षामा रहेका स्थानीय बासिन्दा तथा पर्यटन व्यवसायीका लागि यो आयोजना महत्वपूर्ण उपलब्धिका रूपमा हेरिएको छ । निर्माण सम्पन्न भएपछि स्थानीयवासीको दैनिक जनजीवन सहज हुने अपेक्षा गरिएको छ । हाल लुक्ला क्षेत्रका बासिन्दाले यातायात, निर्माण सामग्री ढुवानी तथा अत्यावश्यक वस्तुहरूको आपूर्तिमा विभिन्न कठिनाइ भोग्दै आएका छन् ।

मोटर बाटो सञ्चालनमा आएपछि यी समस्यामा उल्लेखनीय कमी आउने विश्वास गरिएको छ । यस सडकले पर्यटन क्षेत्रलाई समेत प्रत्यक्ष लाभ पुर्याउने छ । विशेषगरी लुक्ला विमानस्थलको खराब मौसमका कारण पर्यटकहरूले लामो समयसम्म उडानको प्रतीक्षा गर्नुपर्ने बाध्यता रहँदै आएको छ । सडक निर्माणपछि वैकल्पिक यातायात सुविधा उपलब्ध हुने भएकाले पर्यटकहरूको आवतजावत थप सहज हुने र पर्यटन गतिविधिमा वृद्धि हुने अनुमान गरिएको छ ।

सडक निर्माणका लागि सोलुखुम्बुको खुम्बु पासाङल्हामु गाउँपालिकाले आर्थिक वर्षका लागि २ करोड ४४ लाख ८९ हजार ७ सय ९४ रुपैयाँ ८२ पैसा बजेट विनियोजन गरेको जनाएको छ । गाउँपालिकाले निर्धारित समयभित्र गुणस्तरीय निर्माण सम्पन्न गरी स्थानीय आवश्यकता र पर्यटन प्रवद्र्धनलाई प्राथमिकतामा राख्ने लक्ष्य लिएको छ । स्थानीयवासीले सडक निर्माणलाई क्षेत्रीय विकास, आर्थिक गतिविधिको विस्तार तथा पर्यटन प्रवद्र्धनका लागि कोशेढुङ्गा सावित हुने बताएका छन् ।