सोलुदुधकुण्ड ८ केरुङको भवन मेयर शेर्पाबाट उद्घाटन, वडाकाे विकास नगरको प्राथमिकतामा रहेकाे दावी

असार ४, सोलुखुम्बु । सोलुदुधकुण्ड नगरपालिका–८ केरुङमा निर्माण सम्पन्न भएको नयाँ वडा प्रशासनिक भवन उद्घाटन गरिएको छ । आधुनिक सुविधा सम्पन्न भवन सञ्चालनमा आएसँगै स्थानीय नागरिकले अब व्यवस्थित र सहज वातावरणमा सरकारी सेवा प्राप्त गर्न थालेका छन् । सोलुदुधकुण्ड नगरपालिकाको ४० प्रतिशत र जिल्ला समन्वय समिति सोलुखुम्बुको ६० प्रतिशत लागत साझेदारीमा निर्माण गरिएको भवनको एक कार्यक्रमबीच उद्घाटन गरिएको हो । भवन निर्माणका लागि भ्याट सहित १ करोड लाख १४ लाख रुपैयाँ खर्च भएको थियो ।

यसअघि जीर्ण अवस्थाको पुरानो भवनबाट सेवा प्रवाह गर्दै आएको वडा कार्यालय अब आफ्नै सुविधा सम्पन्न भवनमा स्थानान्तरण भएको छ। नयाँ भवनमा कार्यालय सञ्चालनका लागि आवश्यक संरचनासहित मेलमिलाप कक्ष, व्यवस्थीत शौलाचय, वडा स्तरीय पशु तथा कृषि शाखाको समेत व्यवस्था गरिएको छ । यसका अलावा भव्य सभाहलको समेत व्यवस्था छ । जसले स्थानीयस्तरका बैठक, अन्तरक्रिया तथा सामुदायिक कार्यक्रम सञ्चालन गर्न सहज हुने अपेक्षा गरिएको छ।

उद्घाटन कार्यक्रममा बोल्दै सोलुदुधकुण्ड नगरपालिकाका प्रमुख नाम्गेल जाङ्बु शेर्पाले स्थानीय तहको सेवा प्रवाहलाई प्रभावकारी बनाउन भौतिक पूर्वाधार विकासलाई प्राथमिकतामा राखेर काम गरिएको बताउनुभयो । केरुङ भौगोलिक र जनसङ्ख्याका दृष्टिले महत्वपूर्ण वडा भएकाले नगरपालिकाले यस क्षेत्रको विकासलाई विशेष प्राथमिकता दिएको उहाँको भनाइ थियो । मेयर शेर्पाले केरुङको विकास र समृद्धि सधैँ आफ्ना प्राथमिकताको विषय रहँदै आएको समेत उल्लेख गर्नुभयो ।

कार्यक्रममा बोल्दै लागत साझदार निकाय जिल्ला समन्वय समितिका उपप्रमुख टिकामाया मगरले स्थानीय सरकारको विकास निर्माणका कदमहरुमा जिल्ला समन्वय समिति सधै साथमा रहेको दावी गर्नुभएको थियो ।

यस्तै नगरउपप्रमुख गान्धिमाया तामाङले भवन निर्माणका लागि जग्गा उपलब्ध गराउने आङ दोर्जी शेर्पाप्रति आभार व्यक्त गर्दै सार्वजनिक सेवाको गुणस्तर अभिवृद्धिमा भवनले महत्वपूर्ण भूमिका खेल्ने विश्वास व्यक्त गर्नुभयो ।

वडा अध्यक्ष पासाङ कटुवालले नयाँ भवन सञ्चालनमा आएसँगै नागरिकलाई छिटो, सहज र व्यवस्थित सेवा उपलब्ध गराउन थप सहयोग पुग्ने बताउनुभयो । उहाँका अनुसार लामो समयदेखि पुरानो पञ्चायतीकालीन भवनबाट सेवा सञ्चालन हुँदै आएको थियो । अब नयाँ भवनले कार्यालय व्यवस्थापनका साथै सामुदायिक गतिविधि सञ्चालनमा समेत सहजता ल्याउनेछ ।

भवन उद्घद्दाटन कार्यक्रममा सोलुदुधकुण्ड नगरपालिकााक प्रवक्ता तथा वडा नम्बर ६का अध्यक्ष फुर्वा ग्याल्जेन शेर्पा, वडा नम्बर ७ गार्माका अध्यक्ष सोनाम ग्याल्जेन शेर्पा, वडा नम्बर १० का अध्यक्ष होम बहादुर मगर लगायतले शुभकामना व्यक्त गर्दै भवन निर्माणका लागी वडालाई बधाई व्यक्त गर्नुभएको थियो ।

निर्माण कम्पनी ग्रीन तारा कन्स्ट्रक्सन प्रालिले निर्धारित समयभित्र भवन निर्माण सम्पन्न गरेको हो। भवन निर्माणसँगै केरुङमा स्थानीय सरकारको संस्थागत क्षमता र सेवा प्रवाहको स्तर थप मजबुत बनेको स्थानीयवासीको अपेक्षा छ ।

स्थानीय तहको सेवा प्रवाहलाई थप प्रभावकारी र नागरिकमैत्री बनाउने उद्देश्यसहित निर्माण गरिएको भवन केरुङको विकास यात्रामा महत्वपूर्ण पूर्वाधारका रूपमा स्थापित हुने विश्वास गरिएको छ।