सोलुखुम्बुमा १२औँ अन्तर्राष्ट्रिय योग दिवस मनाइयो

सबिना राई, असार ७, सोलुखुम्बु । हिमाली जिल्ला सोलुखुम्बुमा १२औँ अन्तर्राष्ट्रिय योग दिवस मनाइएको छ । आइतबार योङ स्टार क्लब दोर्पू, सल्लेरीमा ‘स्वस्थ वृद्धावस्थाका लागि योग’ भन्ने नारासहित उक्त दिवस मनाइएको हो । जिल्ला आयुर्वेद स्वास्थ्य केन्द्र सोलुखुम्बुद्वारा आयोजित कार्यक्रममा प्रमुख जिल्ला अधिकारी लिला कुमारी के.सी. पाण्डे, जिल्ला स्वास्थ्य कार्यालय सोलुखुम्बुका प्रमुख जीवन चौलागाई, जिल्ला आयुर्वेद स्वास्थ्य केन्द्रका निमित्त कार्यालय प्रमुख बैजनाथ साह, विभिन्न संघसंस्थाका प्रतिनिधि, सुरक्षाकर्मी, शिक्षक–कर्मचारी, विद्यार्थी तथा सञ्चारकर्मीहरूको सहभागिता रहेको थियो ।

कार्यक्रमलाई सम्बोधन गर्दै प्रमुख जिल्ला अधिकारी लिला कुमारी के.सी. पाण्डेले योग केवल शारीरिक व्यायाम मात्र नभई स्वस्थ जीवनशैलीको आधार भएको बताउनुभयो । उहाँले आधुनिक जीवनशैलीका कारण बढ्दै गइरहेका मानसिक तनाव, नसर्ने रोग तथा स्वास्थ्य समस्याबाट बच्न योग महत्वपूर्ण माध्यम भएको उल्लेख गर्नुभयो । कार्यक्रममा सहभागी वक्ताहरूले योगको महत्व, यसको वैज्ञानिक पक्ष तथा स्वास्थ्य क्षेत्रमा यसको सकारात्मक प्रभावबारे प्रकाश पारेका थिए ।

साथै योग अभ्याससमेत प्रदर्शन गरिएको थियो । हरेक वर्ष जुन २१ तारिखका दिन अन्तर्राष्ट्रिय योग दिवस विश्वभर विभिन्न कार्यक्रम आयोजना गरी मनाइन्छ। राष्ट्रसङ्घ महासभाले सन् २०१४ मा गरेको निर्णयअनुसार सन् २०१५ जुन २१ देखि अन्तर्राष्ट्रिय योग दिवस मनाउन थालिएको हो। भारतीय प्रधानमन्त्री नरेन्द्र मोदीले राष्ट्रसङ्घको ६९औँ महासभामा योग दिवसको प्रस्ताव राखेका थिए भने नेपालका तत्कालीन प्रधानमन्त्री सुशील कोइरालाले उक्त प्रस्तावलाई पहिलो समर्थन गरेका थिए ।

नेपालमा भने सरकारले माघ १ गतेलाई राष्ट्रिय योग दिवस घोषणा गरेको छ । हाल नेपालमा माघ १ गते राष्ट्रिय योग दिवस र जुन २१ गते अन्तर्राष्ट्रिय योग दिवस मनाउने परम्परा रहेको छ । पछिल्लो समय योगप्रति जनचासो र अभ्यास बढ्दै गएको आयोजकले जनाएको छ ।