सोताङ–१ मा अपाङ्गता भएका व्यक्तिलाई विद्युतीय जग वितरण

असार १३, सोलुखुम्बु । सोलुखुम्बु, अपाङ्गता भएका व्यक्तिहरूको दैनिक जीवनलाई सहज बनाउने उद्देश्यले सोलुखुम्बुको सोताङ गाउँपालिका वडा नम्बर १ ले विद्युतीय जग वितरण गरेको छ । वडा कार्यालयका अनुसार करिब ५० हजार रुपैयाँ बराबरका विद्युतीय जग पहिचान भएका ५४ जना अपाङ्गता भएका व्यक्तिलाई वितरण गरिएको हो । वितरण कार्यक्रममा वडा अध्यक्ष जङ्ग बहादुर गुरुङ र वडा सचिव आस बहादुर बस्नेतले संयुक्त रूपमा सामग्री हस्तान्तरण गरेका थिए ।

कार्यक्रममा मिलिजुली अपाङ्गता समूहका अध्यक्ष ठेड बहादुर कार्कीको पनि उपस्थिति रहेको थियो । वडा कार्यालयले अपाङ्गता भएका व्यक्तिहरूको दैनिकीलाई सहज बनाउन तथा उनीहरूको जीवनस्तरमा सकारात्मक सहयोग पुर्याउने उद्देश्यले उक्त सामग्री वितरण गरिएको जनाएको छ । यस्ता सामाजिक उत्तरदायित्वका कार्यक्रमलाई आगामी दिनमा पनि निरन्तरता दिइने वडा कार्यालयले जानकारी दिएको छ । स्थानीयहरूले वडा कार्यालयको यस पहलले अपाङ्गता भएका व्यक्तिहरूको दैनिक आवश्यकतामा सहयोग पुग्ने विश्वास व्यक्त गरेका छन् ।