उपभोक्ता समिति गठन गर्दा मनोमानी गरिएको एमालेको आरोप

जेठ २९, साेलुखुम्बु ।  उपभोक्ता समिति गठन गर्दा मनोमानी गरिएको भन्दै एमाले वडा समितिले आरोप लगाएको छ । सोलुखुम्बुको नेचासल्यान गाउँपालिका वडा नम्बर ३ को नेकपा एमाले वडा कमिटिले आज वडा अध्यक्ष सिताराम भट्टराईलाई ध्यानाकर्षण गराउँदै यस्तो आरोप लगाएको हो ।

अध्यक्ष भट्टराईलाई ध्यानाकर्षण पत्र बुझाउदै एमालेले हाल सम्म वडामा सञ्चालन भएका योजना तथा कार्यक्रमहरुको सार्वजनिक सुनुवाई गर्न माग गरेको छ । एमाले वडा कमिटीका अध्यक्ष कल्पना घिमिरे द्धारा हस्ताक्षरित ध्यानाकर्षण पत्रमा विगत २ वर्षमा पालिकाबाट वडालाइृ प्राप्त भएको बजेट कति हो ?, कुनकुन खर्चमा के कति बजेट प्राप्त बजेट भयो ?, केके काम गरियो ? भन्ने कुराहरुको जानकारी औपचारीक रुपमा सार्वजनिक गर्नुपर्ने बताएको छ । यसो नगर्नमा जनप्रतिनिधिको व्यक्तिगत स्वार्थ लुकेको भन्दै एमाले वडा कमिटिले सार्वजनिक सम्पत्तिको दुरुपयोग भएको आशंका व्यक्त गरेको छ ।

ध्यानाकर्षण पत्रमा एमाले ले जनप्रतिनिधिले जनताको चाहाना अनुरुप काम गर्नुपर्नेमा त्यसो नगरि शासकीय स्वरुपमा उत्रिएको बताएको छ । एमालेले अध्यक्ष भट्टराईलाई आफु निकट व्यक्तिलाई मात्रै योजना दिने, योजनाको रकमान्तर गर्ने, मनोमानी ढंगले योजना बाँडफाँड हुने भन्दै त्यसरी समाजको उन्नती नहुने जनाएको छ ।

आर्थिक वर्षको अन्त्यमा आइसक्दा पनि योजना छनौटका लागी भेला नबोलाउने र सार्वजनिक सुनुवाई नगर्ने हो भने आन्दोलन गर्ने पनि एमालेले चेतावनी दिएको छ । साथै एक हप्ता भित्र सार्वजनिक सुनुवाई गर्न एमालेले माग गरेको वडा कमिटी सचिव रोशन कटेलले बताउनुभयो ।

ध्यानाकर्षण पत्र बुझ्दै अध्यक्ष भट्टराईले सार्वजनिक सुनुवाई गर्ने बताउनुभएको छ । उहाँले उपभोक्ता समिति निर्माणमा नियम कानुन संगत नै गरिएकाले एमालेले आरोपका लागी मात्रै आरोप लगाएको बताउनुभएको छ ।