सोलुखुम्बु, असार २५ । राष्ट्रिय स्वतन्त्र पार्टी (रास्वपा) परित्याग गर्दै सोलुखुम्बुका युवा राजनीतिककर्मी ल्हाक्पा शेर्पा पुनः नेपाली कांग्रेसमा फर्किएका छन्। कांग्रेसमा उनको पुनरागमनका लागि नेपाली कांग्रेसका नेता अश्विन बाबु थापा र नवीन थापाले महत्वपूर्ण पहल गरेको बताइएको छ।
ल्हाक्पाले सामाजिक सञ्जालमार्फत आफू नेपाली कांग्रेसमा पुनः आबद्ध भएको जानकारी दिँदै पार्टीभित्र नेतृत्व हस्तान्तरण र पुस्तान्तरण हुनुपर्ने आफ्नो धारणा सुरुदेखि नै रहेको उल्लेख गरेका छन्। वर्तमान राजनीतिक परिवेश र पार्टीभित्र देखिएको नयाँ नेतृत्वप्रतिको विश्वासका कारण आफू पुनः नेपाली कांग्रेसमा फर्किएको उनको भनाइ छ।
कांग्रेस स्रोतका अनुसार ल्हाक्पालाई पार्टीमा पुनः फर्काउन नेता अश्विन बाबु थापा र नवीन थापाले लामो समयदेखि निरन्तर संवाद, समन्वय र पहल गरेका थिए। उनीहरूको सक्रिय प्रयासपछि ल्हाक्पाले रास्वपा छोड्दै नेपाली कांग्रेस रोज्ने निर्णय गरेको जनाइएको छ।
ल्हाक्पाले अब लोकतन्त्रलाई थप सुदृढ बनाउन नेपाली कांग्रेसभित्र रहेर सक्रिय भूमिका निर्वाह गर्ने प्रतिबद्धता व्यक्त गरेका छन्। उनले आफूसँग विभिन्न समयमा जोडिएका साथीहरूलाई पनि पुरानो राजनीतिक घर नेपाली कांग्रेसमा फर्कन आग्रह गरेका छन्।
यसैबीच, नेपाली कांग्रेसका केन्द्रीय सदस्य आङ्गेलु शेर्पा तथा नेपाली कांग्रेस सोलुखुम्बुका पूर्व सभापति विनोदकुमार बस्नेतको उपस्थितिमा ल्हाक्पाको क्रियाशील सदस्यता समेत अद्यावधिक गरिएको जनाइएको छ।
स्थानीय राजनीतिक वृत्तमा ल्हाक्पाको पुनरागमनलाई नेपाली कांग्रेसका लागि सकारात्मक सन्देशका रूपमा हेरिएको छ। विशेषगरी युवा पुस्तालाई पार्टीसँग जोड्ने अभियानमा अश्विन बाबु थापा र नवीन थापाले खेलेको भूमिकालाई कांग्रेस कार्यकर्ताले अर्थपूर्ण पहलका रूपमा चर्चा गरेका छन्।
Discussion about this post