सबिना राई, असार २६, सोलुखुम्बु । सोलुखुम्बुको खुम्बु पासाङल्हामु गाउँपालिकाले आर्थिक वर्ष २०८२/८३ को आफ्नो वार्षिक आय–व्यय सार्वजनिक गरेको छ । आर्थिक कार्यविधि तथा वित्तीय उत्तरदायित्व नियमावली २०७७ को नियम ३० बमोजिम आर्थिक वर्ष समाप्त हुनुभन्दा कम्तिमा एक हप्ता अगावै भुक्तानी निकासा बन्द गर्नुपर्ने कानुनी व्यवस्था अनुसार गाउँपालिकाले गत असार २५ गते राति १२ः०० बजेदेखि सम्पूर्ण भुक्तानी निकासा बन्द गरी चालु आर्थिक वर्षको वित्तीय विवरण सार्वजनिक गरेको हो ।
गाउँपालिकाका प्रमुख प्रशासकीय अधिकृत नवराज गौतमका अनुसार आर्थिक वर्ष २०८२/८३ मा गाउँपालिकाको कुल बजेट खर्च ६४.३५ प्रतिशत भएको छ । सार्वजनिक विवरण अनुसार समीक्षा अवधिमा चालु खर्चतर्फ ७४.७४ प्रतिशत र पुँजीगत खर्चतर्फ ५९.०४ प्रतिशत खर्च भएको प्रमुख प्रशासकीय अधिकृत गौतमले जानकारी दिनुभयो । यस्तै गाउँपालिकाले सार्वजनिक गरेको तथ्याङ्क अनुसार गत आर्थिक वर्ष २०८१/८२ को तुलनामा चालु आर्थिक वर्षको कुल बजेट खर्च र पुँजीगत खर्चमा सुधार देखिएको छ ।
गत आर्थिक वर्ष २०८१/८२ मा कुल जम्मा ६३.८६ प्रतिशत मात्र बजेट खर्च भएकोमा यस वर्ष त्यसमा वृद्धि भई ६४.३५ प्रतिशत पुगेको छ । यस्तै, गत वर्ष पुँजीगत खर्च ४८.६५ प्रतिशत मात्र रहेकोमा यस वर्ष सुधार भई ५९.०४ प्रतिशत पुगेको छ । यद्यपि, गत वर्ष ७९.१६ प्रतिशत रहेको चालु खर्च भने यस वर्ष घटेर ७४.७४ प्रतिशतमा सीमित भएको छ । नियम अनुसार समयमै भुक्तानी निकासा बन्द गरी आर्थिक पारदर्शीता कायम गर्न गाउँपालिका प्रतिबद्ध रहेको र आगामी वर्षहरूमा पुँजीगत खर्चको दरलाई अझ बढाउँदै लैजाने लक्ष्य राखिएको गाउँपालिकाले जनाएको छ ।
Discussion about this post