सोलुखुम्बुमा मापसे गरी कुटपिट, घाइतेलाई हेलिकोप्टरमार्फत काठमाडौं पठाइयो

सोलुखुम्बु, असार ३१ । सोलुखुम्बुको खुम्बु पासाङल्हामु गाउँपालिका–२ सुर्केस्थित शेर्पा टी हाउसमा मादक पदार्थ सेवन (मापसे) गरी एक युवामाथि कुटपिट भएको छ । जिल्ला प्रहरी कार्यालय, सोलुखुम्बुका अनुसार असार २९ गते राति करिब १०ः३० बजे शेर्पा टी हाउसका सञ्चालक आङरिता शेर्पाको होटलमा बसिरहेका ग्याल्जिन शेर्पाका २५ वर्षीय छोरा लाक्पा सोनाम शेर्पामाथि थुलुङ दूधकोशी गाउँपालिका–७ का एक जना र खोटाङको केपिलासगढी गाउँपालिका–७ का एक जना गरी दुई जनाको समूहले कुटपिट गरेका हुन् ।

प्रहरीका अनुसार मापसे गरेका ती व्यक्तिहरूले कुटपिटका क्रममा कुकरको ढकनीले लाक्पा सोनाम शेर्पाको टाउकोमा प्रहार गर्दा उहाँ घाइते हुनुभएको थियो । घाइते शेर्पालाई थप उपचारका लागि असार ३० गते दिउँसो २ः३० बजे अल्टिच्युड एयरको हेलिकोप्टरमार्फत काठमाडौंस्थित न्युरो अस्पताल, बाँसबारी पठाइएको प्रहरीले जनाएको छ । घटनामा संलग्न दुवै प्रतिवादीलाई नियन्त्रणमा लिई आवश्यक अनुसन्धान भइरहेको जिल्ला प्रहरी कार्यालय, सोलुखुम्बुका प्रहरी निरीक्षक मौसम तामाङले जानकारी दिनुभयो ।