काठमाडौँमा बसोबास गर्ने फाप्लुका नागरिकलाई लक्षित गरी एकीकृत सेवा शिविर

असार ३२, सोलुखुम्बु । सोलुखुम्बुको सोलुदूधकुण्ड नगरपालिका वडा नम्बर ४ वडा कार्यालयले काठमाडौँमा अस्थायी रूपमा बसोबास गरिरहेका आफ्ना नागरिकलाई लक्षित गरी एकीकृत सेवा शविर सञ्चालन गर्ने भएको छ । नगरकार्यपालिकाको २०८३ साल असार ३१ गते बसेको बैठकको निर्णयअनुसार सञ्चालन हुन लागेको उक्त शिविरमार्फत विभिन्न प्रशासनिक तथा नागरिक सेवाहरू प्रदान गरिने वडा कार्यालयले जनाएको छ ।

शिविरमा सामाजिक सुरक्षा भत्ता दर्ता तथा बायोमेट्रिक प्रमाणीकरण, जन्म, मृत्यु, विवाह, बसाइँसराइ र सम्बन्धविच्छेदलगायतका नागरिक पञ्जीकरणसम्बन्धी सेवा, राष्ट्रिय परिचयपत्र वितरण तथा वडा कार्यालयबाट प्रदान गरिने अन्य सेवासमेत उपलब्ध गराइने सूचनामा उल्लेख छ । वडा कार्यालयका अनुसार शिविर काठमाडौँको रामनगर पार्टी प्यालेसमा २०८३ साल साउन ७ र ८ गते सञ्चालन हुनेछ । शिविरसम्बन्धी थप जानकारीका लागि वडा अध्यक्ष तथा वडा सचिवसँग सम्पर्क गर्न सकिने वडा कार्यालयले जनाएको छ ।