सोलुमा एक वर्षमा ५६ सडक दुर्घटना, ७ जनाको मृत्यु 

साउन २, सोलुखुम्बु । सोलुखुम्बुका गत आर्थिक वर्षमा ५६ सडक दुर्घटनाबाट ७ जनाको ज्यान गएको छ ।   हिमाली जिल्ला सोलुखुम्बुमा आर्थिक वर्ष २०८२/८३ को विभिन्न महिनाहरूमा भएका  ५६ वटा दुर्घटनामा ७ जनाको मृत्यु भएको हो ।  जिल्ला ट्राफिक प्रहरी कार्यालय सोलुखुम्बुका अनुसार यस वर्ष सबैभन्दा धेरै दुर्घटना माघ महिनामा भएका छन् ।  यसरी भएका दुर्घटनाबाट जिल्लामा ७ जनाको ज्यान गएको जनाइएको छ ।

प्रहरीका अनुसार मृत्यु हुनेमा १ जना बालीका, २ जना महिला र ४ जना पुरुष रहेका छन् ।  दुर्घटनाबाट सबैभन्दा धेरै ज्यान कार्तिक महिनामा गएको प्रहरीको तथ्याङ्कले देखाएको छ । कार्तिक महिनामा १ पुरुष २ महिला र १ बालीकाको दुर्घटनाबाट मृत्यु भएको छ । भने असोजमा १ जना र पौषमा १ जनाको ज्यान गएको जिल्ला ट्राफिक प्रहरी कार्यालय सोलुखुम्बुका सूचना अधिकारी चन्द्र बस्नेतले बताउनुभयो ।

उहाँका अनुसार दुर्घटनाबाट १० जना गम्भीर घाइते भएका थिए भने ५३ जना साधारण घाइते भएका थिए ।  जिल्लामा दुर्घटनाका मुख्य कारण सडक साँघुरो हुनु, उकालो ओरालो, घुम्ती, कच्ची वा जीर्ण सडक, सडक प्रयोगकर्ताको असावधानी जस्ता कारणहरू रहेका छन् ।  दुर्घटना बढेपछि प्रहरीले सचेतना अभियान सञ्चालन गरि दुर्घटना न्यूनिकरणका कार्यक्रमहरू समेत गरेको सूचना अधिकारी बस्नेतले बताउनुभयो ।