रहस्यमय मृत्युको हव बन्यो खोटाङ, दिनप्रतिदिन वेवारीसे अवस्थामा शव भेटीने क्रम बढ्दो

श्रावण ३, सोलुखुम्बु ।  खोटाङको दिक्तेल रुपाकोट मझुवागढी नगरपालिका–६ माम्खाकी एक महिला खोलामा मृत अवस्थामा फेला परेकी छन् । जिल्ला प्रहरी कार्यालय खोटाङका अनुसार स्थानीय ४३ वर्षीया शान्ता राई घरबाट निस्किएपछि सम्पर्कविहीन भएकी थिइन्। आफन्तले खोजतलास गर्ने क्रममा शुक्रबार राति करिब ८ः३० बजे घरबाट करिब ५० मिटर पूर्वतर्फ रहेको छागें खोलामा उनको शव फेला परेको हो ।

घटनाको जानकारी राति ९ः४५ बजे प्रहरीलाई प्राप्त हुनासाथ अस्थायी प्रहरी चौकी तालखर्कबाट प्रहरी सहायक निरीक्षक किशोरकुमार हजारी थारुको नेतृत्वमा तथा जिल्ला प्रहरी कार्यालय खोटाङबाट प्रहरी निरीक्षक निराजन बस्नेतको नेतृत्वमा प्रहरी टोली घटनास्थल पुगेको थियो ।

प्रहरीले शवलाई खोलाबाट सुरक्षित रूपमा निकालेर मृतककै घरमा राखेको जनाएको छ । घटनास्थलमा आवश्यक कानुनी प्रक्रिया तथा मुचुल्का कार्य शनिबार सम्पन्न गरिने प्रहरीले जनाएको छ । मृत्युको कारण खुल्न नसकेको र घटनाबारे थप अनुसन्धान भइरहेको जिल्ला प्रहरी कार्यालय खोटाङले जनाएको छ।