सोलुखुम्बुमा एन.सि.सि. अल्मुनाई एशोसिएशन गठन, ७ सदस्यीय सल्लाहकार र २१ सदस्यीय जिल्ला कार्यसमिति चयन

साउन ०३,   गाेमा बस्नेत, साेलुखुम्बु । “Once a Cadet, Forever a Leader” भन्ने मूल नारा तथा “Discipline • Leadership • Service (अनुशासन • नेतृत्व • सेवा)” भन्ने मूल मन्त्रका साथ NCC Alumni Association Nepal को सोलुखुम्बुमा ७ सदस्यीय सल्लाहकार समिति र २१ सदस्यीय जिल्ला कार्यसमिति गठन गरिएको छ।

दुर्गा बक्स गण, सोलुखुम्बुको समन्वयमा सम्पन्न कार्यक्रममा राष्ट्रिय सेवा दल (NCC) का विभिन्न ब्याचका पूर्व क्याडेटहरूलाई एउटै साझा मञ्चमा आबद्ध गर्ने उद्देश्यले सल्लाहकार समिति तथा जिल्ला कार्यसमिति गठन गरिएको हो। नवगठित समितिले पूर्व क्याडेटहरूको अनुभव, सीप, नेतृत्व क्षमता तथा सामाजिक उत्तरदायित्वलाई समाज र राष्ट्रको समृद्धिका लागि परिचालन गर्ने प्रतिबद्धता व्यक्त गरेको छ।

कार्यक्रमलाई सम्बोधन गर्दै दुर्गा बक्स गण, सोलुखुम्बुका गुल्मपति  सेनानी गोपाल भण्डारी ले NCC बाट प्राप्त अनुशासन, नेतृत्व क्षमता र सेवाभावलाई प्रशिक्षण अवधिमा मात्र सीमित नराखी जीवनभर समाज र राष्ट्रको हितमा प्रयोग गर्नुपर्नेमा जोड दिनुभयो। उहाँले NCC Alumni Association Nepal ले पूर्व क्याडेटहरूलाई एउटै राष्ट्रिय सञ्जालमा आबद्ध गर्दै राष्ट्र निर्माणमा थप प्रभावकारी भूमिका खेल्ने विश्वास व्यक्त गर्नुभयो।

गुल्मपति भण्डारीले संस्थाको ध्येय पूर्व क्याडेटहरूलाई एउटै नेटवर्कमा आबद्ध गर्ने, युवा पुस्तामा अनुशासन र नेतृत्व विकासलाई प्रवर्द्धन गर्ने, सामाजिक सेवा तथा स्वयंसेवी अभियान सञ्चालन गर्ने, विपद् व्यवस्थापन तथा राहत कार्यमा सहयोग पुर्‍याउने तथा राष्ट्र निर्माणमा सकारात्मक योगदान दिने रहेको बताउनुभयो।

उहाँका अनुसार संस्थाले पूर्व क्याडेटहरूको राष्ट्रिय सञ्जाल निर्माण, नेतृत्व विकाससम्बन्धी तालिम सञ्चालन, युवा स्वयंसेवा प्रवर्द्धन, शिक्षा, स्वास्थ्य तथा वातावरण संरक्षणका अभियान सञ्चालन, विपद् व्यवस्थापनमा सहकार्य, राष्ट्रिय एकता र सामाजिक सद्भावको प्रवर्द्धन तथा रोजगार, सीप विकास र करियर मार्गदर्शनजस्ता कार्यक्रमलाई प्राथमिकताका साथ अघि बढाउनेछ।

कार्यक्रममा सहभागी पूर्व क्याडेटहरूले NCC मार्फत प्राप्त अनुशासन, आत्मविश्वास, नेतृत्व क्षमता र सेवाभावलाई समाज र राष्ट्रको हितमा निरन्तर उपयोग गर्ने प्रतिबद्धता जनाएका थिए। उनीहरूले जिल्ला स्तरबाट सुरु भएको यो अभियानलाई प्रदेश तथा राष्ट्रिय स्तरसम्म विस्तार गर्दै पूर्व क्याडेटहरूको बलियो सञ्जाल निर्माण गर्ने विश्वास व्यक्त गरे।

नवगठित NCC Alumni Association Nepal, सोलुखुम्बु जिल्ला कार्यसमिति ले आगामी दिनमा नेतृत्व विकास, स्वयंसेवी अभियान, रक्तदान, वृक्षारोपण, विपद् व्यवस्थापन, प्राथमिक उपचार तालिम, युवा क्षमता अभिवृद्धि तथा सामुदायिक विकासका विविध कार्यक्रम सञ्चालन गर्दै अनुशासित, सक्षम र सेवामुखी समाज निर्माणमा सक्रिय योगदान पुर्‍याउने जनाएको छ।