ठुलाे वर्षात हुने भन्दै अनावश्यक यात्रा नगर्न सोलुदुधकुण्डको आग्रह, पर्यटकलाई उच्च सतर्कता अपनाउन खुम्बुको अपिल

साउन ३, साेलुखुम्बु ।  राष्ट्रिय विपद् जोखिम न्यूनीकरण तथा व्यवस्थापन प्राधिकरण ले जारी गरेको उच्च सतर्कता सम्बन्धी सूचना अनुसार सोलुदुधकुण्ड नगरपालिकाले नागरिकलाई विशेष सतर्कता अपनाउन आग्रह गरेको छ । नगरपालिकाले साझा गरेको सूचनाअनुसार जल तथा मौसम विज्ञान विभागको पूर्वानुमानका आधारमा साउन २ र ३ गते (शनिवार र आइतबार ) कोशी, गण्डकी, लुम्बिनी र सुदूरपश्चिम प्रदेशका पहाडी तथा तराईका केही स्थानमा अति भारी वर्षा हुने सम्भावना रहेको छ ।

त्यस्तै मधेश, बागमती र गण्डकी प्रदेशका केही स्थानमा समेत भारीदेखि अति भारी वर्षा हुने पूर्वानुमान गरिएको छ। प्राधिकरणले निरन्तर वर्षाका कारण अचानक बाढी, पहिरो, भू–क्षय, डुबान तथा सडक अवरुद्ध हुने जोखिम उच्च रहेको भन्दै सर्वसाधारणलाई अत्यावश्यक कामबाहेक यात्रा नगर्न, जोखिमयुक्त क्षेत्रमा नबस्न तथा सुरक्षित स्थानमा रहन अनुरोध गरेको छ। सूचनामा विशेषगरी कोशी प्रदेशका विभिन्न जिल्लासहित सोलुखुम्बुमा पनि वर्षाको समयमा सडक यात्रा गर्दा विशेष सावधानी अपनाउन आग्रह गरिएको छ। वर्षाका कारण सडक अवरुद्ध हुन सक्ने भएकाले स्थानीय प्रशासन तथा सुरक्षा निकायको सूचनालाई निरन्तर पालना गर्न भनिएको छ।

नगरपालिकाले पनि प्राधिकरणको यही सूचनालाई साझा गर्दै नदी, खोला तथा पहिरोको जोखिम भएका क्षेत्रबाट टाढा रहन, मौसमको अद्यावधिक जानकारी पछ्याउन र विपद्को सम्भावित जोखिमबाट जोगिन आवश्यक सतर्कता अपनाउन सबै नगरवासीलाई अनुरोध गरेको छ ।

यसैविच खुम्बु पासाङल्हामु गाउँपालिकाले गाउँपालिकावासी, पर्यटक, पर्यटन व्यवसायी तथा सरोकारवालालाई उच्च सतर्कता अपनाउन सार्वजनिक सूचना जारी गरेको छ । गाउँपालिकाका प्रमुख प्रशासकीय अधिकृत नवराज गौतमद्वारा जारी सूचनामा निरन्तर वर्षाका कारण बाढी, पहिरो, सडक तथा पदमार्ग अवरुद्ध हुने, नदी तथा खोलामा पानीको बहाव बढ्ने लगायतका मनसुनजन्य विपद्का घटना हुन सक्ने भएकाले सबैलाई विशेष सावधानी अपनाउन आग्रह गरिएको छ।

सूचनामा गाउँपालिकाभित्र कुनै पनि मनसुनजन्य विपद्को घटना भएमा वा त्यस्तो जोखिम देखिएमा तत्काल सम्बन्धित वडा कार्यालय वा गाउँपालिकाको कार्यालयमा जानकारी गराउन अनुरोध गरिएको छ। यसले उद्धार, राहत तथा प्रतिकार्यलाई प्रभावकारी बनाउन सहयोग पुग्ने गाउँपालिकाको विश्वास छ । सगरमाथा क्षेत्र भ्रमणका लागि आउने पर्यटकको चाप रहने यस मौसममा अनावश्यक यात्रा नगर्न, मौसमको अवस्था बुझेर मात्रै यात्रा गर्न तथा स्थानीय प्रशासन र सुरक्षा निकायबाट जारी सूचनाको पालना गर्न समेत आग्रह गरिएको छ।