लिखुपिकेले काठमाण्डौमा रहेका पालिकाबासीलाई शिविर मार्फत सरकारी सेवा दिँदै

साउन ७, सोलुखुम्बु । सोलुखुम्बुको लिखुपिके गाउँपालिकाले काठमाण्डौमा रहेका पालिकाबासीको लागी सेवा प्रवाह शिविर आयोजना गर्ने भएको छ ।  गाउँपालिकाका विभिन्न वडामा स्थायी ठेगाना भई काठमाण्डौमा रहँदै आएका गर्दै आइरहेका नागरिकको सहजताका लागी शिविरको आयोजना गर्न लागिएको गाउँपालिकाले जनाएको छ ।  आगामी साउन १८, १९ र २० गते तिन दिन काठमाण्डौ स्थित शेर्पा सेवा केन्द्र टुसालमा शिविर सञ्चालन हुने गाउँपालिकाको वडा नम्बर २ का अध्यक्ष मणिराम बस्नेतले बताउनुभयो ।  

उहाँका अनुसार शिविरमा सामाजिक सुरक्षा भत्ता प्राप्त गर्ने लाभग्राहीहरूको नवीकरण तथा बायोमेट्रिक भेरिफिकेसन, पञ्जिकरण सम्बन्धी सेवाहरू, राष्ट्रिय परिचयपत्र वितरण तथा वडा कार्यालयबाट प्रवाह गरिने सबैखाले सेवाहरू प्रदान गरिने छ ।  गाउँपालिकाका सबै वडाका स्थायी बसोबास गर्ने नागरिकहरूले सेवा लिन सक्ने भएकाले सो अवधीमा उक्त शिविरमा सहभागिता जनाउन गाउँपालिकाले अनुरोध गरेको छ ।

सामान्य सरकारी सेवा लिनका लागी पालिका पुग्न लाग्ने खर्च र सास्तीलाई मध्यनजर गरेर शिविर मार्फत सेवा दिन लागिएको गाउँपालिकाले जानकारी दिएको छ ।  यता काठमाण्डाैमा शिविर मार्फत सेवा प्रवाह गर्न जाँदा यता वडा कार्यालयबाट हुने नियमित सेवा प्रवाह भने साउन १७ देखी २२ सम्म प्रभावित हुने भएकाे छ ।   सोलुखुम्बुका अधिकांश पालिकाहरूले वर्षमा एक पटक घुम्ती सेवा शिविर मार्फत सेवा दिने प्रचलनलाई निरन्तरता दिँदै आएका छन् ।