अनाधिकृत शेयर कारोवारमा एपेक्स मकालु हाइड्रोपावरको चासो, जगेडा सेयर बाहिरका मान्छेलाई नबेच्न आग्रह

साउन २२, सोलुखुम्बु । महाकुलुङ गाउँपालिकामा निर्माणाधीन एपेक्स मकालु हाइड्रोपावर लिमिटेडको शेयर बिक्रीसम्बन्धी विषय विवादमा तानिएपछी यस विषयमा विभिन्न राजनितिक दलले चासो बढाएका छन् । कम्पनीले आफूले तोकेको प्रक्रियाविपरीत केही व्यक्तिले शेयर खरिद गरेको भन्दै सूचना जारी गरेको छ भने श्रम संस्कृति पार्टी महाकुलुङ–काठमाडौं सम्पर्क मञ्चले कम्पनीको शेयर कारोबारमा अनियमितता भएको भन्दै कम्पनीको कार्यालय पुगेर जानकारी लिएको हो ।

कम्पनीले २०८३ असार १९ गते प्रकाशित गरेको सूचनामा २०८३ जेठ २८ गते सम्पन्न विशेष साधारणसभाको निर्णयअनुसार कम्पनीमा तत्काल कायम शेयरधनीको नाममा रहेको १०० कित्ता शेयर बराबर २७ कित्ता शेयर खरिद गर्न पाउने गरी जगेडा शेयर बिक्री गर्न खुल्ला गरेको थियो । तर, सूचनाविपरीत शेयरधनीबाहेकका केही व्यक्तिले समेत जगेडा शेयर खरिद गरेको जानकारी प्राप्त भएपछि हाललाई त्यस्तो कार्य नगर्न र नगराउन कम्पनीले सूचना निकालेरै अनुरोध गरेको छ ।

यता श्रम संस्कृति पार्टी महाकुलुङ–काठमाडौं सम्पर्क मञ्चले एपेक्स मकालु हाइड्रोपावरसँग सम्बन्धित विषय केही समयदेखि सामाजिक सञ्जालमा विभिन्न विवाद तथा अन्योलका रूपमा देखिँदै आएको भन्दखै कम्पनीको कार्यालयमा पुगेर जानकारी लिएको सम्पर्क मञ्चका अध्यक्ष विशाल कुलुङले बताउनुभयो । उहाँले प्रमोटर शेयर किनबेच भइरहेको र कानुनअनुसार प्रतिकित्ता १०० रुपैयाँमा हुनुपर्ने शेयर केही व्यक्तिमार्फत प्रतिकित्ता १२० रुपैयाँसम्ममा बेचीरहेको भन्ने जानकारी सञ्चार माध्यम मार्फत प्राप्त भएपछि आफूहरूले कम्पनीको कार्यालयमा पुगेर यस विषयमा छलफल गरेको बताउनुभयो ।

छलफलका क्रममा कम्पनीले हाल पुराना शेयरधनीलाई मात्र राइट शेयरसरह प्रतिकित्ता १०० रुपैयाँका दरले शेयर बिक्री खुला गरेको र सो शेयरको मूल्य प्रतिकित्ता १०० रुपैयाँ नै रहेको जानकारी गराएको मञ्चले जनाएको छ । मञ्चका अनुसार कम्पनीले यस विषयमा सत्यतथ्य छानबिन गर्न सहमति जनाएको थियो । छानबिन पूरा भएपछि संस्थापक शेयरको राइट शेयरसँग सम्बन्धित शेयरधनीले दर्खास्त नहालेमा प्रक्रियागत हिसाबले सार्वजनिक सूचनामार्फत सर्वसाधारणका लागि प्रतिकित्ता १०० रुपैयाँमै शेयर खुलाउने विषयमा कम्पनी सहमत भएको मञ्चको भनाइ छ । त्यसैगरी भविष्यमा कोही पनि ठगीमा नपरोस् र थप अन्योल सिर्जना नहोस् भन्ने उद्देश्यले कम्पनीले तीन दिनभित्र राष्ट्रिय दैनिक पत्रिकामार्फत यस विषयमा आधिकारिक सूचना प्रकाशित गर्ने सहमति जनाएको मञ्चले विज्ञप्तिमार्फत जनाएको छ।