अपाङ्गता रोकथाममा नेचासल्यानको उत्कृष्ट प्रगति, ९२ प्रतिशत बजेट खर्च

साउन २३, सोलुखुम्बु । सोलुखुम्बुको नेचासल्यान गाउँपालिकामा सञ्चालित अपाङ्गता रोकथाम तथा पुनःस्थापना कार्यक्रमअन्तर्गत गत आर्थिक वर्ष २०८२.८३ मा कुल बजेटको ९२ प्रतिशत रकम खर्च भएको छ । गाउँपालिकाको महिला तथा बालबालिका शाखाकी सहायक महिला विकास निरीक्षक अस्मिता भुजेलका अनुसार गत आर्थिक वर्षमा विनियोजित कुल २२ लाख ८९ हजार ६ सय ७५ रुपैयाँ बजेटमध्ये २१ लाख ९ हजार ५ सय ७४ रुपैयाँ खर्च भएको हो ।

नेचासल्यान गाउँपालिकामा प्रदेश सरकारबाट प्राप्त ९ लाख १ हजार रुपैयाँ बजेटमध्ये ८ लाख ११ हजार २ सय ७ रुपैयाँ खर्च भएको छ । यसैगरी गाउँपालिकाले आफ्नै स्रोतबाट छुट्याएको ९ लाख १ हजार रुपैयाँमा पनि ८ लाख ११ हजार २ सय ७ रुपैयाँ नै खर्च भएको जनाइएको छ । कार्यक्रममा साझेदार संस्था करुणा फाउन्डेसन नेपालबाट प्राप्त ४ लाख ८७ हजार ६ सय ७६ रुपैयाँमध्ये ४ लाख ८७ हजार १ सय ६१ रुपैयाँ बजेट परिचालन गरिएको छ ।

अपाङ्गता रोकथाम तथा पुनःस्थापना कार्यक्रमलाई निरन्तरता दिन चालू आर्थिक वर्ष २०८३/८४ का लागि मन्त्रालयबाट स्वीकृत भई जम्मा १८ लाख ८९ हजार १ सय ३० रुपैयाँ बजेट विनियोजन गरिएको छ । जसमा गाउँपालिकाको लागत साझेदारीतर्फ १० लाख २० हजार रुपैयाँ र मन्त्रालयको लागत साझेदारीतर्फ ८ लाख ७० हजार रुपैयाँ रहेको छ ।

गाउँपालिकाले अभिमुखीकरण, पारदर्शिता, सहकार्य र उत्प्रेरणाका माध्यमबाट कार्यक्रममा समुदायको सहभागिता बढाएको जनाएको छ । आवश्यकताका आधारमा लक्षित वर्ग छनोट गरी तालिम प्रदान गरिएको छ भने सहकारीको महत्त्व बुझाएर रकम मिलानको कामसमेत सुरु गरिएको छ। हाल नेचासल्यान गाउँपालिकामा विभिन्न वर्गका २ सय ८२ जना अपाङ्गता भएका व्यक्तिहरूको पहिचान गरी पुनःस्थापनाका कार्यक्रमहरू अघि बढाइएको छ ।