खिजिदेम्बा गाउँपालिकाले सुरु ग¥यो काठमाण्डौमा तीनदिने एकीकृत शिविर सुरु

साउन २५, ओखलढुङ्गा । ओखलढुङ्गाको खिजिदेम्बा गाउँपालिकाले काठमाडौंमा बसोबास गर्दै आएका खिजिदेम्बावासी नागरिकलाई लक्षित गरी तीनदिने एकीकृत सेवा शिविर सुरु गरेको छ । गाउँपालिकाबाट प्राप्त हुने विभिन्न सरकारी सेवाहरु काठमाडौंमै उपलब्ध गराउने उद्देश्यले शिविर आयोजना गरिएको हो ।

काठमाण्डौको जोरपाटीस्थित शेर्पा पार्टी प्यालेसमा श्रावण २५ गतेदेखि सुरु भएको शिविर २७ गतेसम्म सञ्चालन हुनेछ । शिविरसँगै गाउँपालिकाले सार्वजनिक सुनुवाइ तथा सुझाव संकलन कार्यक्रमसमेत आयोजना गरेको छ । गाउँपालिकाबाट प्रवाह हुने विभिन्न सेवा लिन ओखलढुङ्गा पुग्नुपर्ने बाध्यता रहेका काठमाडौंमा बसोबास गर्ने नागरिकलाई लक्षित गरी शिविर सञ्चालन गरिएको गाउँपालिकाले जनाएको छ । शिविरमा सहभागी भएर सेवा लिन तथा गाउँपालिकाको कामकारबाहीबारे आफ्ना सुझाव, गुनासा थथा अपेक्षा राख्न गाउँपालिकाले खिजिदेम्बावासीलाई आग्रह गरेको छ ।

सेवा शिविरमा गाउँपालिकाबाट उपलब्ध हुने विभिन्न प्रशासनिक तथा अन्य सेवाका लागि आवश्यक सहजीकरण भइरहेको जनाइएको छ । नागरिकका गुनासा र सुझाव प्रत्यक्ष रूपमा सुन्ने तथा स्थानीय सरकार र नागरिकबीचको सम्बन्ध थप सुदृढ गर्ने उद्देश्यले सार्वजनिक सुनुवाइसमेत आयोजना गरिएको हो ।

कार्यक्रममा प्रतिनिधिसभा सदस्य तथा राष्ट्रिय स्वतन्त्र पार्टीका नेता विश्वराज पोखरेल, खिजिदेम्बा गाउँपालिकाका अध्यक्ष गम्बु शेर्पालगायत जनप्रतिनिधि तथा काठमाडौंमा बसोबास गर्दै आएका खिजिदेम्बावासीको उपस्थिति रहेको थियो । गाउँपालिकाले काठमाडौंमा रहेका सम्पूर्ण खिजिदेम्बावासीलाई शिविरमा सहभागी भई गाउँपालिकाबाट उपलब्ध हुने सेवा लिन तथा गाउँपालिकाको सेवा प्रवाह, विकास निर्माण र आगामी योजनाका विषयमा आफ्ना सुझाव तथा अपेक्षा राख्न अनुरोध गरेको छ ।