खोटाङमा विभिन्न कार्यक्रमसहित सामुदायिक वन दिवस मनाइयो

साउन २५, खोटाङ । सामुदायिक वनमा युवाको सहभागिता बढाउँदै हरित अर्थतन्त्र र दिगो वन व्यवस्थापनलाई प्रवद्र्धन गर्ने उद्देश्यका साथ खोटाङमा सामुदायिक वन दिवस २०८३ विविध कार्यक्रमसहित मनाइएको छ। दिक्तेल रुपाकोट मझुवागढी नगरपालिका, डिभिजन वन कार्यालय खोटाङ र सामुदायिक वन उपभोक्ता महासंघ जिल्ला महासंघ खोटाङको संयुक्त आयोजनामा उक्त कार्यक्रम सम्पन्न भएको हो।

दिवसका अवसरमा दिक्तेल बजार परिसरमा प्रभातफेरी, सरसफाइ तथा वृक्षारोपणलगायतका कार्यक्रम आयोजना गरिएका थिए । सहभागीहरूले ‘गाउँको वन, गाउँकै धन, बचाऔँ सामुदायिक वन’ लगायतका चेतनामूलक सन्देश लेखिएका प्लेकार्डसहित बजार परिक्रमा गरेका थिए । प्रभातफेरी पश्चात् देविस्थान परिसरमा सरसफाइ गरी विभिन्न प्रजातिका बिरुवा रोपिएको डिभिजन वन कार्यालय खोटाङका वन अधिकृत बिनोद खतिवडाले जानकारी दिनुभयो ।

कार्यक्रममा बोल्दै दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराईले वन संरक्षणलाई स्थानीय सरकारले उच्च प्राथमिकतामा राखेको बताउनुभयो। हरियाली संरक्षण तथा वातावरणीय सन्तुलन कायम राख्न समाजका सबै पक्षको सहकार्य र ऐक्यबद्धता आवश्यक रहेको उहाँको भनाइ थियो।

यस्तै, डिभिजन वन कार्यालय खोटाङका प्रमुख राजन राईले सामुदायिक वन प्रणालीलाई नेपालको एक सफल वन संरक्षण मोडेलका रूपमा स्थापित भइसकेको उल्लेख गर्नुभयो। उहाँले दिगो वन व्यवस्थापन, जैविक विविधताको संरक्षण तथा वनजन्य स्रोतको उचित सदुपयोगका लागि युवा पुस्ताको सक्रिय र नेतृत्वदायी भूमिका अपरिहार्य रहेकोमा जोड दिनुभयो ।