सोलुखुम्बुमा विपदबाट एक करोड १९ लाखभन्दा बढीको क्षति

साउन २५, सोलुखुम्बु । हिमाली जिल्ला सोलुखुम्बुमा गत आर्थिक वर्ष २०८२/०८३ मा विभिन्न विपद्का घटनाबाट एक करोड १९ लाख रुपियाँभन्दा बढीको आर्थिक क्षति भएको छ । जिल्ला प्रहरी कार्यालय सोलुखुम्बुले सार्वजनिक गरेको तथ्याङ्क अनुसार गत आर्थिक वर्षभरिमा घटेका विपद्का घटनाबाट कूल एक करोड १९ लाख २७ हजार रुपियाँ बराबरको भौतिक क्षति भएको हो ।

प्रहरी निरीक्षक एवं सूचना अधिकारी निर्मल थापाका अनुसार जिल्लामा आगलागीका घटनाबाट सबैभन्दा बढी क्षति पुगेको छ । वर्षभरिमा घटेका २५ वटा आगलागीका घटनाबाट ७९ लाख २६ हजार रुपियाँ बराबरको सम्पत्ति नष्ट भएको छ । यस्तै, ३० वटा बाढी तथा पहिरोका घटनाबाट करिब ३४ लाख रुपियाँ बराबरको नोक्सानी भएको जिल्ला प्रहरी कार्यालयले जनाएको छ ।

तथ्याङ्क अनुसार चार वटा चट्याङका घटनामा एक लाख ९५ हजार रुपियाँ, १० वटा हावाहुरीका घटनाबाट ४५ हजार रुपियाँ र अन्य विविध विपद्का घटनाबाट एक हजार रुपियाँ बराबरको क्षति भएको छ । गएको एक वर्षको अवधिमा जिल्लाभर कूल ८३ वटा विपद्का घटना घट्दा आगलागीमा परेर एक जनाको ज्यान गएको छ भने अन्य विभिन्न घटनामा परी १३ जना घाइते भएका छन् ।