कोशीमा सत्ता सहकार्यअघि नै भागबन्डाको राजनिती, नेकपा चार मन्त्रालयको अडानमा

साउन २५, सोलुखुम्बु । सत्ता सहकार्यका लागि सहमति गरेका नेकपा एमाले र नेपाली कम्युनिस्ट पार्टी (नेकपा) बीच कोशी प्रदेशमा मन्त्रालय बाँडफाँट मुख्य चुनौतीका रूपमा देखिएको छ । सरकारमा सहभागी हुने विषयमा सहमति बने पनि दुवै दलबीच मन्त्रालयको संख्यालाई लिएर मतभेद देखिएको हो । कोशी प्रदेशमा हाल नौवटा मन्त्रालय छन् । नेकपाले चार मन्त्रालयमा दाबी गरे पनि एमालेले भने तीन मन्त्रालय मात्रै दिन सकिने संकेत गरेको छ । एमालेको प्रस्तावअनुसार सत्ता साझेदारी ६–३ को अनुपातमा हुनेछ ।

नेकपा संसदीय दलका नेता इन्द्रबहादुर आङ्बोले आफ्नो पार्टीले चार मन्त्रालय पाउनुपर्ने अडान रहेको बताएका छन् । उनका अनुसार एमालेसँग यस विषयमा औपचारिक छलफल भने सुरु भइसकेको छैन । हाल कोशी प्रदेश सरकारमा नेपाली कांग्रेसका चार मन्त्री र एक राज्यमन्त्री छन् । कांग्रेसले पाएको प्रतिनिधित्वकै आधारमा नेकपाले पनि चार मन्त्रालय पाउनुपर्ने दाबी गर्दै आएको छ । मन्त्रालय बाँडफाँटसँगै सत्ता सहकार्यको आधार तय गर्न छलफलमा न्यूनतम साझा कार्यक्रम र चालु बजेटको पुनरावलोकनलगायत विषयमा समेत छलफल हुने आङ्बोले बताएका छन् ।

यता, एमालेका सचिव तथा कोशी प्रदेश इन्चार्ज शेरधन राईले भने नेकपालाई तीन मन्त्रालय दिन सकिने बताएका छन् । आइतबार सञ्चारकर्मीसँग कुरा गर्दै राईले दुई दलबीच ६–३ को अनुपातमा सत्ता साझेदारी हुने बताएका थिए । यससँगै सरकारमा सहभागी हुने विषयमा सहमति नजिक पुगेका दुई कम्युनिस्ट दलबीच मन्त्रालयको संख्या र शक्ति बाँडफाँट कसरी मिलाउने भन्ने प्रश्न पेचिलो बनेको छ । सत्ता सहकार्यको औपचारिक रूपरेखा तय गर्नुअघि नै देखिएको यो मतभेदले आगामी सरकारको स्वरूप र शक्ति सन्तुलनबारे चासो बढाएको छ ।