खोटाङमा आत्महत्याबाट एक वर्षमा ७६ जनाले ज्यान गुमाए

अशोक राई, खोटाङ | खोटाङमा आत्महत्याका घटना पछिल्ला वर्षमा निरन्तर बढ्दै गएको जिल्ला प्रहरी कार्यालयको तथ्यांकले देखाएको छ। आर्थिक वर्ष २०८२/८३ मा जिल्लामा ७६ जनाले आत्महत्या गरेका छन् । जिल्ला प्रहरी कार्यालय खोटाङका अनुसार गत आर्थिक वर्ष आत्महत्या गर्नेमा ७२ जना झुण्डिएको र ४ जना विष सेवन गरेको तथ्यांक छ । आर्थिक वर्ष २०८१/८२ मा झुण्डिएर ५६ जना र विष सेवनबाट ३ जनाले आत्महत्या गरेका थिए । यसअघि आर्थिक वर्ष २०८०/८१ मा झुण्डिएर ३७ जना, विष सेवनबाट ३ जना र हाम फालेर १ जनाले आत्महत्या गरेका थिए । तीन वर्षको तथ्यांक हेर्दा झुण्डिएर आत्महत्या गर्नेको संख्या मात्रै ३७ बाट ५६ हुँदै ७२ पुगेको देखिन्छ । अर्थात् दुई वर्षको अवधिमा यस्तो घटना झण्डै दोब्बर भएको छ । जिल्ला प्रहरी कार्यालयले आत्महत्याका घटना बढ्नुका साथै मादक पदार्थ सेवनबाट हुने झै–झगडा र लागुऔषधको बढ्दो प्रयोगलाई चुनौतीका रूपमा औंल्याएको छ। जनशक्तिको कमी, जिल्लाको भौगोलिक अवस्था, बाटोघाटोको समस्या तथा बाढी–पहिरो र चट्याङजस्ता विपद् पनि प्रहरीका प्रमुख चुनौती रहेको कार्यालयले जनाएको छ ।

कर्तव्य ज्यानका घटना पनि बढे

     खोटाङमा कर्तव्य ज्यानसम्बन्धी घटना पनि पछिल्लो वर्ष बढेको छ । आर्थिक वर्ष २०८०/८१ मा ४ वटा, २०८१/८२ मा ५ वटा र २०८२/८३ मा ७ वटा कर्तव्य ज्यानका मुद्दा दर्ता भएका छन् । प्रहरीका अनुसार तीनै आर्थिक वर्षमा दर्ता भएका सबै मुद्दा फर्छ्योट भएका छन् ।

महिला तथा बालबालिकाविरुद्धका अपराधमा कमी

    महिला तथा बालबालिकाविरुद्धका अपराध भने पछिल्लो आर्थिक वर्षमा घटेको प्रहरी तथ्यांकले देखाएको छ । आर्थिक वर्ष २०८०/८१ मा जबरजस्ती करणीका २७, जबरजस्ती करणी उद्योगका ७ र बाल यौन दुरुपयोगका ३ गरी ३७ वटा घटना दर्ता भएका थिए। २०८१/८२ मा यस्तो संख्या बढेर ४७ पुगेको थियो । तर आर्थिक वर्ष २०८२/८३ मा जबरजस्ती करणीका १४, जबरजस्ती करणी उद्योगका ८, मानव बेचबिखनको १ र बहुविवाहका ३ गरी २६ वटा घटना दर्ता भएका छन् । गत आर्थिक वर्ष मानव बेचबिखनसम्बन्धी एक घटना पहिलोपटक दर्ता भएको छ भने बाल यौन दुरुपयोगका घटना शून्यमा झरेका छन् ।

हराएका सबै व्यक्ति फेला

    प्रहरीका अनुसार आर्थिक वर्ष २०८२/८३ मा हराएका सबै व्यक्ति फेला परेका छन् । सो अवधिमा ३१ महिला, १२ पुरुष र २२ बालबालिका हराएको निवेदन परेको थियो। अघिल्ला दुई आर्थिक वर्षमा हराएका व्यक्तिको खोजीमा पनि सबैलाई फेला पारिएको प्रहरीको तथ्यांक छ ।

सडक दुर्घटना घटे, घाइतेको संख्या पनि कम

    आर्थिक वर्ष २०८२/८३ मा खोटाङमा ८६ वटा सवारी दुर्घटना भएका छन्। दुर्घटनामा ७ जनाको मृत्यु र ९१ जना घाइते भएका छन् । अघिल्लो आर्थिक वर्ष २०८१/८२ मा भने १३३ वटा दुर्घटना हुँदा ६ जनाको मृत्यु र १२६ जना घाइते भएका थिए। तथ्यांकअनुसार दुर्घटनाको संख्या र घाइते हुनेको संख्या घटेको छ भने मृत्यु हुनेको संख्या भने एक जनाले बढेको छ ।

प्रहरीको गस्ती र उजुरी पनि बढ्दो

      जिल्ला प्रहरी कार्यालयका अनुसार आर्थिक वर्ष २०८२/८३ मा १५ हजार १८३ पटक गस्ती गरिएको छ। कार्यालयमा ६७८ वटा उजुरी तथा निवेदन प्राप्त भएका छन् भने आकस्मिक सहायताका लागि २ हजार ४४० वटा कल प्राप्त भएका छन् । समुदाय–प्रहरी साझेदारी कार्यक्रमअन्तर्गत ७४० वटा कार्यक्रम सञ्चालन गरिएको कार्यालयले जनाएको छ। वन पैदावार तथा नदीजन्य स्रोतको अवैध कारोबार, उत्खनन र ओसारपसार नियन्त्रणबाट १ लाख ५५ हजार ३०० रुपैयाँ राजस्व संकलन भएको छ।

जिल्ला प्रहरी कार्यालयले समुदायसँगको सहकार्यमा प्रहरी कार्यक्रम, विद्यालयस्तरीय सचेतना, प्राथमिक उपचार तथा CPR अभ्यास, भीड नियन्त्रण अभ्यास र पीडित पुनःभेट कार्यक्रम सञ्चालन गर्दै आएको जनाएको छ। जिल्ला प्रहरी कार्यालय खोटाङले बिहीबार आर्थिक वर्ष २०८२/८३ मा सम्पादन गरेका कार्यहरूको समीक्षा तथा पत्रकार भेटघाट कार्यक्रम आयोजना गरी उक्त तथ्यांक सार्वजनिक गरेको हो ।