बाँदरलाई हानेको गोली भाईलाइ लाग्यो, स्पटमै मृत्यु

भाद्र ३०, सोलुखुम्बु । खोटाङमा बाँदर धपाउने क्रममा भरुवा बन्दुकको गोली लागेर एक जनाको मृत्यु भएको छ ।

दिक्तेल रुपाकोट मझुवागढी नगरपालिका–११ स्थित जंगलमा सोमबार दिउँसो भरुवा बन्दुकको गोली लागेर स्थानीय ५३ वर्षीय श्यामबहादुर तामाङको घटनास्थलमै मृत्यु भएको प्रहरीले जनाएको छ ।

प्रहरीका अनुसार करिब ५४ वर्षीय भलबहादुर तामाङले बाँदर धपाउने क्रममा चलाएको भरुवा बन्दुकको गोली उनकाे काकाकाे छाेरा भाइ श्यामबहादुरको टाउकोमा लागेको थियो । गोली लागेपछि भाइ श्यामबहादुरको घटनास्थलमै मृत्यु भएको हो ।

घटनाबारे दिउँसो करिब २ बजेर ५० मिनेटमा जानकारी प्राप्त भएपछि अस्थायी प्रहरी पोष्ट खार्मीबाट प्रहरी टोली घटनास्थल पुगेको थियो । प्रहरीले घटनामा प्रयोग भएको भरुवा बन्दुकसहित भलबहादुर तामाङलाई नियन्त्रणमा लिएको जनाएको छ ।

घटनाको थप अनुसन्धान तथा कानुनी प्रक्रिया अघि बढाउन जिल्ला प्रहरी कार्यालय खोटाङबाट प्रहरी निरीक्षक निराजन बस्नेतको कमान्डमा अपराध अनुसन्धान तथा घटनास्थल अनुसन्धानका लागि प्रहरी टोली घटनास्थलतर्फ गएको प्रहरीले जनाएको छ ।