टाक्सिन्दु मा १८३ भन्दा बढी विद्यार्थीलाई विद्यालय पोशाकविका

भदौ ३१, सोलुखुम्बु । सोलुखुम्बुको सोलुदूधकुण्ड नगरपालिका–१ टाक्सिन्दुस्थित टाक्सिन्दु माध्यमिक विद्यालयका १८३ भन्दा बढी विद्यार्थीलाई विद्यालय पोशाक वितरण गरिएको छ । मोनभिसो नेपाल फाउन्डेसन काठमाडौँको समन्वय तथा ट्रेन्टिनो फर लाङटाङ, इटालीको सहयोगमा आयोजित कार्यक्रममा विद्यार्थीलाई सर्ट, पाइन्ट, स्वटर र जुत्ता वितरण गरिएको हो । सोही अवसरमा विद्यालयका सम्पूर्ण शिक्षक तथा कर्मचारीलाई न्यानो ज्याकेटसमेत प्रदान गरिएको विद्यालयले जनाएको छ ।

विद्यालयमा आयोजित कार्यक्रममा सोलुदूधकुण्ड नगरपालिका–१ का वडाध्यक्ष छोङ्बा शेर्पाको प्रमुख आतिथ्य तथा मोनभिसो नेपाल फाउन्डेसनका अध्यक्ष छोङ्बा लामा शेर्पा, कोषाध्यक्ष लाक्पा तेम्बा शेर्पा र इटालीका नागरिक सर रोजारियो सालाको विशेष उपस्थितिमा पोशाक हस्तान्तरण गरिएको थियो । २०७२ सालको भूकम्पपछि नेपालमा स्थापना भएको मोनभिसो नेपाल फाउन्डेसनले भूकम्पबाट क्षतिग्रस्त टाक्सिन्दु माध्यमिक विद्यालयको पुनर्निर्माणमा सहयोग गर्दै आएको छ ।

पछिल्लो समय संस्थाले विद्यालयको शैक्षिक तथा भौतिक विकासमा समेत निरन्तर सहयोग गर्दै आएको विद्यालयका शिक्षक तथा सूचना अधिकारी शक्ति कुलुङले जानकारी दिनुभयो ।संस्थाले विद्यालयमा शिक्षक तथा विद्यार्थीका लागि छात्रावास, विद्यालय भवन निर्माण गर्नुका साथै ल्यापटप, डेस्कटप, प्रोजेक्टर, विज्ञान प्रयोगशाला, पुस्तकालयलगायतका शैक्षिक सामग्री उपलब्ध गराएको छ ।

विद्यार्थीका लागि दिलकुमारी छात्रावासअन्तर्गत छात्र र छात्राका लागि छुट्टाछुट्टै दुईवटा छात्रावास सञ्चालनमा रहेको विद्यालयले जनाएको छ । त्यस्तै, संस्थाकै सहयोगमा माध्यमिक तहमा विज्ञान विषय अध्यापनका लागि शिक्षकको समेत व्यवस्था गरिएको छ । यसबाट दुर्गम क्षेत्रका विद्यार्थीलाई गुणस्तरीय तथा प्रविधिमैत्री शिक्षाको अवसर प्राप्त गर्न सहयोग पुगेको विद्यालयको भनाइ छ ।

मोनभिसो नेपाल फाउन्डेसनले सोलुखुम्बुका विभिन्न विद्यालयमा आवश्यकता र प्राथमिकताका आधारमा विद्यालय भवन निर्माण, शैक्षिक सामग्री, प्रविधि, प्रयोगशाला, पुस्तकालय तथा विद्यार्थीका लागि आवश्यक सामग्रीलगायतका सहयोग गर्दै आएको छ । संस्थाको निरन्तर सहयोगले दुर्गम क्षेत्रका विद्यालयको शैक्षिक तथा भौतिक विकासमा महत्वपूर्ण योगदान पुगेको विद्यालयले जनाएको छ ।