विपत्तिमा माप्य दूधकोशीको साथ : बाढीपीडित परिवारलाई १ लाख रुपैयाँ राहत दिने

भदौ ३१, सोलुखुम्बु । भोटेकोशीमा आएको विनाशकारी बाढीबाट प्रभावित परिवारलाई सोलुखुम्बुको माप्य दूधकोशी गाउँपालिकाले प्रत्यक्ष आर्थिक राहत उपलब्ध गराउने भएको छ । गाउँपालिकाले प्राकृतिक विपत्तिमा परी पीडित भएका प्रत्येक परिवारलाई एक लाख रुपैयाँका दरले राहत उपलब्ध गराउने निर्णय गरेको हो ।

बुधबार गाउँपालिका अध्यक्ष बुद्धिकिरण राईको अध्यक्षतामा बसेको कार्यपालिका बैठकले विपत्तिबाट प्रभावित परिवारलाई स्थानीय सरकारको तर्फबाट आर्थिक सहयोग गर्ने निर्णय गरेको गाउँपालिकाले जनाएको छ । गत भदौ १० गते भोटेकोशीमा आएको बाढीका कारण माप्य दूधकोशी गाउँपालिकासहित विभिन्न क्षेत्रमा जनधनको क्षति भएको थियो ।

विपत्तिबाट प्रभावित परिवारलाई तत्काल राहत उपलब्ध गराई संकटको समयमा स्थानीय सरकारको साथ र सहयोग सुनिश्चित गर्ने उद्देश्यले प्रतिपरिवार एक लाख रुपैयाँ दिने निर्णय गरिएको गाउँपालिकाका उपाध्यक्ष गौरव राईले जानकारी दिनुभयो । बैठकले बाढीका कारण भएको जनधनको क्षतिप्रति दुःख व्यक्त गर्दै मृतकप्रति श्रद्धाञ्जली अर्पण गरेको छ । साथै, बेपत्ता नागरिकको सकुशलताको कामना गर्दै घाइतेहरूको शीघ्र स्वास्थ्यलाभको कामना गरिएको गाउँपालिकाले जनाएको छ । गाउँपालिकाले विपत्तिपछि प्रभावित परिवारको अवस्था तथा क्षतिको विवरणका आधारमा राहत वितरणको प्रक्रिया अघि बढाउने जनाएको छ ।