प्रतिकूल मौसमले सगरमाथा पर्यटन प्रभावित, बाढीको असर छैन

असोज १, सोलुखुम्बु । सगरमाथा राष्ट्रिय निकुञ्जमा चालु आर्थिक वर्ष २०८२/८३ को सुरुवाती दुई महिनामा पर्यटक आगमन अघिल्लो वर्षको सोही अवधिको तुलनामा घटेको छ । प्रतिकूल मौसम, हवाई उडानमा आएको अवरोधलगायत कारणले सगरमाथा क्षेत्रको पर्यटन प्रभावित भएको निकुञ्जले जनाएको छ ।

निकुञ्जका अनुसार चालु आर्थिक वर्षको साउनमा २९३ र भदौमा एक हजार १०४ गरी दुई महिनामा एक हजार ३९७ जना पर्यटकले निकुञ्ज भ्रमण गरेका छन् । भदौमा भ्रमण गर्ने पर्यटकमध्ये ८८९ जना विदेशी तथा बाँकी २१५ जना नेपाली र सार्क राष्ट्रका नागरिक रहेका छन्। गत आर्थिक वर्ष २०८१/८२ को साउनमा २५४ जना पर्यटकले निकुञ्ज भ्रमण गरेका थिए। तीमध्ये १६३ जना विदेशी, ३५ जना सार्क राष्ट्रका र ५६ जना नेपाली थिए । यस्तै, भदौमा एक हजार ३१८ जनाले भ्रमण गरेकामा एक हजार २० जना विदेशी, १३५ जना सार्क राष्ट्रका र १६३ जना नेपाली नागरिक रहेका थिए ।

सगरमाथा राष्ट्रिय निकुञ्जका सूचना अधिकारी तथा संरक्षण अधिकृत विवेक बैजुका अनुसार मौसम प्रतिकूल हुँदा कतिपय पर्यटक काठमाडौँमै रोकिएका छन्। पछिल्लो करिब तीन दिनदेखि लुक्लामा हवाई उडान हुन नसक्दा पर्यटकको आवागमन थप प्रभावित भएको उहाँले बताउनुभयो । उहाँका अनुसार सगरमाथा क्षेत्रमा पर्यटक आगमनमा कमी आउनुको मुख्य कारण प्रतिकूल मौसम देखिएको छ ।

अघिल्लो वर्षको साउन र भदौको तथ्याङ्कसँग तुलना गर्दा पनि मौसमका कारण पर्यटक आवागमनमा उतारचढाव देखिएको उहाँको भनाइ छ । भोटेकोशीमा आएको बाढीका कारण यस वर्ष सगरमाथा क्षेत्रको पर्यटनमा असर परेको चर्चा भए पनि त्यसकै कारण पर्यटक घटेको हो भन्ने यकिन तथ्याङ्क भने अहिलेसम्म प्राप्त नभएको निकुञ्जले जनाएको छ ।

पर्यटन व्यवसायीका अनुसार सगरमाथा क्षेत्रको पर्यटनमा मौसमसँगै यातायात तथा हवाई सेवाको नियमितता महत्वपूर्ण हुन्छ । लुक्ला विमानस्थलमा उडान प्रभावित हुँदा काठमाडौँमा पर्यटक रोकिने र त्यसको प्रभाव सगरमाथा क्षेत्रका होटल, ट्रेकिङ तथा अन्य पर्यटन व्यवसायमा पर्ने गर्छ । पर्यटनको मुख्य मौसम सुरु हुन लागेका बेला बाढी, सडक तथा हवाई यातायातमा देखिएको अवरोध र मौसमसम्बन्धी समस्याले आगामी पर्यटकीय सिजनमा कस्तो प्रभाव पार्छ भन्ने चासो बढेको छ ।