किरात राई यायोक्खा सोलुखुम्बुको अध्यक्षमा किराती पुनः चयन

असोज ७, सोलुखुम्बु । किरात राई यायोक्खा जिल्ला कार्य समिति सोलुखुम्बुको अध्यक्षमा राम सङ्घर्ष किराती पुनः चयन हुनुभएको छ । किरात राई यायोक्खाको दोस्रो जिल्ला अधिवेशनले किरातीको अध्यक्षतामा १३ सदस्यीय जिल्ला कार्यसमिति चयन गरेको हो । समितिको उपाध्यक्षमा प्रविन चाम्लिङ, सचिवमा प्रेमध्वज राई र कोषाध्यक्षमा अम्बिका खालीङ चयन हुनुभएको छ । त्यसैगरी सदस्यमा कुलबहादुर राई, तिलक राई, लोकेन्द्र राई, चन्द्रकला राई र निरकुमार राईलगायत चयन हुनुभएको जनाइएको छ ।

अधिवेशनबाट पुनः अध्यक्षमा चयन हुनुभएका किरातीले आगामी दिनमा जिल्लामा किरात राई यायोक्खालाई थप सशक्त र व्यवस्थित बनाउँदै लैजाने बताउनुभयो । उहाँले किरात राई समुदायको संस्कार, संस्कृति र पहिचान संरक्षण तथा प्रवद्र्धनका लागि संस्थालाई सक्रिय बनाउने प्रतिबद्धता व्यक्त गर्नुभयो ।

कार्यक्रममा थुलुङ दूधकोशी गाउँपालिकाका कार्यवाहक अध्यक्ष सबिता राईले नवनिर्वाचित कार्यसमितिलाई शुभकामना दिँदै किरात राई समुदायको संस्कार, संस्कृति र पहिचान संरक्षणमा थप प्रभावकारी भूमिका निर्वाह गर्न आग्रह गर्नुभयो । अधिवेशनमा सहभागी अन्य वक्ताले पनि नयाँ कार्यसमितिलाई सफल कार्यकालको शुभकामना व्यक्त गरेका छन् ।