विहीबार र शुक्रबारका लागी ऐसेलुखर्कका सबै विद्यालय बन्द

असोज ८, सोलुखुम्बु । खोटाङको ऐसेलुखर्क गाउँपालिकाले मौसम प्रतिकुल बनेपछि २ दिन विद्यालय बन्द गर्ने भएका छ । गाउँपालिकाका कार्यवाहक अध्यक्ष राजेशराज भण्डारीका अनुसार असोज ८ र ९ गते विहीबार र शुक्रबार विद्यालय बन्द गर्ने निर्णय गरिएको हो । देशका विभिन्न स्थानमा भारीदेखि अति भारी वर्षा, उच्च पहाडी क्षेत्रमा हावाहुरी र चट्याङ पर्ने सम्भावनाको पूर्वानुमानलाई मध्यनजर गर्दै गाउँपालिकाले दुई दिनका लागि विद्यालय बन्द गर्ने निर्णय गरेको गाउँपालिकाका शिक्षा शाखा प्रमुख निर कुमार बस्नेतले बताउनुभयो ।

उहाँका अनुसार मौसम विज्ञान विभाग, राष्ट्रिय विपद् जोखिम न्यूनीकरण तथा व्यवस्थापन प्राधिकरण र सम्बन्धित क्षेत्रका विज्ञहरूको पूर्वानुमानअनुसार बाढी, पहिरो तथा डुबानजस्ता विपद्को उच्च जोखिम रहेकाले गाउँपालिकाले यस्तो कदम चालको हो । ऐसेलुखर्क गाउँपालिका गाउँ कार्यपालिकाको कार्यालयले जारी गरेको सूचनाअनुसार विद्यार्थी, शिक्षक तथा कर्मचारीहरूको सुरक्षालाई प्राथमिकता दिँदै गाउँपालिकाअन्तर्गत सञ्चालित सम्पूर्ण विद्यालयहरूमा मिति २०८३ असोज ८ र ९ गते (दुई दिन) पठनपाठन बन्द गर्ने निर्णय गरिएको छ ।

साथै, विपद्को सम्भावित जोखिमबाट बालबालिकाहरूलाई बचाउन घरमै सुरक्षित राख्न, नदी, खोला, पोखरी तथा पहिरोको जोखिम भएका स्थानमा जान नदिन सम्पूर्ण अभिभावकहरूलाई विशेष अनुरोध गरिएको छ। यस चुनौतीपूर्ण समयमा विद्यार्थी तथा अभिभावकहरूसँग नियमित सम्पर्कमा रहन सम्पूर्ण प्रधानाध्यापक तथा शिक्षक वर्गलाई आग्रह गरिएको छ भने सम्पूर्ण गाउँपालिकावासीलाई उच्च सतर्कता अपनाई घरमै सुरक्षित रहन हार्दिक अपिल गरिएको छ।