प्रतिकूल मौसमका कारण सोलुदुधकुण्डका सबै विद्यालय शुक्रबार बन्द हुने

असोज ८, सोलुखुम्बु ।  लगातारको वर्षा र प्रतिकूल मौसमका कारण उत्पन्न हुन सक्ने जोखिमलाई ध्यानमा राख्दै सोलुदुधकुण्ड नगरपालिका क्षेत्रभित्रका सम्पूर्ण विद्यालयहरूमा असोज ९ गते शुक्रबार एक दिनका लागि बिदा दिइएको छ । जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणको पूर्वानुमानअनुसार असोज ९, १० र ११ गते देशका विभिन्न स्थानमा भारीदेखि अति भारी वर्षा, उच्च पहाडी तथा हिमाली क्षेत्रमा हिमपात, हावाहुरी र चट्याङ पर्ने सम्भावना रहेको छ। नगरपालिका क्षेत्रमा पनि निरन्तर वर्षा भइरहेकाले बाढी, पहिरो र खोलानालामा पानीको बहाव बढ्ने खतरालाई मध्यनजर गर्दै नगरप्रमुखस्तरीय निर्णयबाट विद्यालय बन्द गर्ने निर्णय गरिएको हो। नगर प्रवक्ता फुर्वाग्याल्जेन शेर्पाद्वारा जारी सूचनामा विद्यार्थी, शिक्षक तथा कर्मचारीको सुरक्षा सुनिश्चित गर्न विद्यालय बन्द गरिएको उल्लेख छ। साथै, सम्भावित जोखिमबाट बच्न र सुरक्षाका लागि आवश्यक सजगता तथा सतर्कता अपनाउन नगरबासीलाई अनुरोध गरिएको छ।