उदयपुरका आठवटै पालिकामा कांग्रेसको नेतृत्व चयन

असोज ८, उदयपुर । नेपाली कांग्रेसको १५ औँ महाधिवेशनअन्तर्गत उदयपुरका आठवटै स्थानीय तहमा गाउँ तथा नगर अधिवेशन सम्पन्न भएको छ। तीन नगरपालिकामा निर्वाचनमार्फत र पाँच स्थानीय तहमा सर्वसम्मत रूपमा नेतृत्व चयन गरिएको छ। जिल्ला सदरमुकामसमेत रहेको त्रियुगा नगरपालिकाको सभापतिमा प्रकाशकुमार खड्का दोस्रो कार्यकालका लागि निर्वाचित भएका छन्। उपसभापतिमा उमेश बुढाथोकी र शर्मिला थापा, सचिवमा उद्धव काफ्ले तथा सहसचिवमा तीर्थकुमार श्रेष्ठ चयन भएका छन्। चौदण्डीगढी नगरपालिकाको सभापतिमा पर्वत दाहाल निर्वाचित भएका छन्।

उपसभापतिमा उषा राई र राकेशकुमार चौधरी, सचिवमा केदारकुमार केसी तथा सहसचिवमा आरतीकुमारी चौधरी निर्वाचित भएका छन्। बेलका नगरपालिकाको सभापतिमा टंक आचार्य निर्वाचित भएका छन्। उपसभापतिमा प्रमिला विश्वकर्मा र राजेन्द्र बिष्ट, सचिवमा सुजता राई तथा सहसचिवमा झमक कार्की चयन भएका छन्। बेलकामा सभापति पदका लागि चार जनाबीच प्रतिस्पर्धा भएको थियो ।

त्यस्तै, निर्वाचन क्षेत्र नम्बर २ अन्तर्गतका पाँच स्थानीय तहमा भने सर्वसम्मत रूपमा नेतृत्व चयन गरिएको छ। कटारी नगरपालिकाको सभापतिमा पुष्कर खड्का, रौतामाई गाउँपालिकामा घमानसिंह थापामगर, उदयपुरगढी गाउँपालिकामा चण्डेश्वर श्रेष्ठ, ताप्ली गाउँपालिकामा महादेव रास्कोटी तथा लिम्चुङबुङ गाउँपालिकामा हिकमत राई चयन भएका छन्।

पालिका तहको नेतृत्व चयनसँगै अब कांग्रेसको ध्यान प्रदेशसभा तथा प्रतिनिधिसभा क्षेत्रीय अधिवेशनतर्फ केन्द्रित भएको छ। कांग्रेसको संशोधित कार्यतालिकाअनुसार प्रदेशसभा तथा प्रतिनिधिसभा क्षेत्रीय अधिवेशन असोज १० गते हुँदैछ भने केन्द्रीय महाधिवेशन असोज १६ देखि १९ गतेसम्म काठमाडौंमा हुने तय छ । पालिका अधिवेशनबाट निर्वाचित सभापति, पदाधिकारी तथा क्षेत्रीय प्रतिनिधिको भूमिकाले आगामी क्षेत्रीय तथा माथिल्लो तहको नेतृत्व चयनमा प्रभाव पार्ने भएकाले उदयपुर कांग्रेसभित्र अबको चासो क्षेत्रीय अधिवेशनतर्फ बढेको छ।