१३ गतेलाइ साेलु सर्याे कांग्रेसकाे क्षेत्रीय अधिवेशन

साेलुखुम्बु, असाेज ८ ।  सोलुखुम्बुमा प्रतिकूल मौसमका कारण नेपाली कांग्रेसको क्षेत्रीय अधिवेशन कार्यक्रम स्थगित भएको छ। लगातारको वर्षा तथा प्रतिकूल मौसमका कारण पूर्वनिर्धारित समयमा अधिवेशन सञ्चालन गर्न कठिनाइ भएपछि कांग्रेस जिल्ला कार्यसम्पादन समितिले क्षेत्रीय अधिवेशनको कार्यतालिका परिवर्तन गरेको हो।

नेपाली कांग्रेस जिल्ला कार्यसम्पादन समिति सोलुखुम्बुको बैठकले क्षेत्रीय अधिवेशनअन्तर्गतको निर्वाचन प्रक्रिया केही दिन पछाडि सार्ने निर्णय गरेको जनाएको छ। नयाँ कार्यतालिकाअनुसार यही असोज १२ गते दिउँसो १ बजेदेखि निर्वाचन प्रक्रियाअन्तर्गत मनोनयन दर्ता सुरु गरिनेछ। त्यसैगरी, उम्मेदवारी मनोनयनलगायतका आवश्यक निर्वाचन प्रक्रिया पूरा गरेपछि असोज १३ गते क्षेत्रीय अधिवेशनको निर्वाचन गर्ने निर्णय गरिएको कांग्रेस सोलुखुम्बुले जनाएको छ। मौसमका कारण जिल्लाका विभिन्न क्षेत्रमा आवतजावतमा समस्या तथा सडक यातायात प्रभावित भइरहेका बेला कांग्रेसले अधिवेशनको निर्वाचन प्रक्रिया स्थगित गरेको हो।

अधिवेशनमा सहभागी हुने प्रतिनिधि तथा उम्मेदवारलाई समेत मौसम र यातायातको अवस्थाले प्रभाव पार्न सक्ने भएकाले कार्यतालिका परिवर्तन गरिएको जनाइएको छ। नेपाली कांग्रेसको १५औँ महाधिवेशनअन्तर्गत सोलुखुम्बुमा वडा तहको अधिवेशन प्रक्रिया सम्पन्न भइसकेको छ। जिल्लाका ५२ वटै वडामा अधिवेशन सम्पन्न भइसकेको कांग्रेसले जनाएको छ। त्यस्तै, जिल्लाका ८ स्थानीय तहमध्ये ६ वटा पालिकामा समेत अधिवेशन सम्पन्न भइसकेको छ।

यससँगै कांग्रेस सोलुखुम्बुमा वडा र स्थानीय तह हुँदै क्षेत्रीय तहको नेतृत्व चयनको प्रक्रिया अघि बढिरहेको छ। बाँकी स्थानीय तहमा अधिवेशन सम्पन्न भएपछि जिल्ला तह हुँदै महाधिवेशन प्रतिनिधि चयनलगायतका प्रक्रिया अघि बढ्नेछन्।यसअघि निर्धारित कार्यतालिकाअनुसार क्षेत्रीय अधिवेशन सम्पन्न गर्ने तयारी गरिएको भए पनि मौसम प्रतिकूल भएपछि जिल्ला कार्यसम्पादन समितिको बैठकले निर्वाचनको मिति परिवर्तन गरेको हो। कांग्रेस सोलुखुम्बुले नयाँ कार्यतालिकाअनुसार असोज १२ गते दिउँसो १ बजेबाट मनोनयन दर्ता प्रक्रिया सुरु हुने र असोज १३ गते निर्वाचन हुने भएकाले सम्बन्धित प्रतिनिधि, उम्मेदवार तथा पार्टीका नेता कार्यकर्तालाई सोहीअनुसार तयारी गर्न आग्रह गरेको छ।