अविरल वर्षातको प्रभाव ः हाल सम्म सोलुमा ७ घर पाहिरोको जोखिममा

असाेज ९, साेलुखुम्बु । अविरल वर्षाका कारण हिमाली जिल्ला सोलुखुम्बुका विभिन्न स्थानमा जनजीवन प्रभावित बन्नुका साथै भौतिक संरचना र निजी सम्पत्तिमा क्षतिको जोखिम बढेको छ । लगातारको वर्षातका कारण जिल्लाका अधिकांश ग्रामीण सडक सञ्चालनयोग्य अवस्थामा नरहेको स्थानीयले बताएका छन् ।

सडक अवरुद्ध हुँदा आवतजावतमा समस्या हुनुका साथै वर्षाका कारण विभिन्न बस्ती तथा घरहरू समेत जोखिममा परेका छन्। मनसुनको उत्तरार्धमा भइरहेको अविरल वर्षाका कारण थुलुङ दुधकोशी गाउँपालिका–७, देउसामा तीनवटा घर जोखिममा परेको जिल्ला प्रहरीले जनाएको छ। जोखिममा रहेका परिवारलाई सुरक्षित स्थानमा सारिएको प्रहरीले जनाएको छ। यस्तै, सोलुदुधकुण्ड नगरपालिका–स्थित दोर्पु क्षेत्रमा पहिरो जाँदा तीनवटा घर जोखिममा परेका छन्।

तर, पहिरो बस्तीभन्दा करिब पाँच सय मिटर तल रहेकाले तत्काल ठूलो जोखिम नरहेको प्रहरीले जनाएको छ । यता पत्ताले क्षेत्रमा गएको पहिरोका कारण २ वटा घर जोखिममा रहेको जिल्ला प्रहरी कार्यालय सोलुखुम्बुका प्रमुख नविनराजा बुढाथोकीले बताउनुभयो । उहाँले निरन्तर वर्षा भइरहेकाले पहिरो थप फैलिन सक्ने सम्भावनालाई मध्यनजर गर्दै जोखिममा रहेका स्थानीयलाई सचेत गराइएको बताउनुभयो ।

जिल्लाका विभिन्न स्थानमा सडक अवरुद्ध हुनुका साथै पहिरो र कटानको जोखिम बढेपछि स्थानीय तह तथा सुरक्षा निकायले सतर्कता अपनाउन नागरिकलाई आग्रह गरेका छन्। वर्षा अझै जारी रहेकाले पहिरो तथा बाढीको जोखिम रहेका क्षेत्रमा अनावश्यक आवतजावत नगर्न र सुरक्षित स्थानमा रहन आग्रह गरिएको छ ।