पहिरोका कारण अवरुद्ध सोलुखुम्बु–काठमाडौँ सडक अस्थायी रूपमा सञ्चालन

असोज १०, सोलुखुम्बु । पहिरोका कारण अवरुद्ध बनेको सोलुखुम्बु–काठमाडौँ सडकखण्ड अस्थायी रूपमा सञ्चालनमा आएको छ । जिल्लाको स्थलमार्गबाट प्रवेश गर्ने मुख्य नाका सिद्धिचरण लोकमार्गअन्तर्गत सोलुदूधकुण्ड नगरपालिका–११ सिस्नेरीको साल्मे क्षेत्रमा सडक भासिएपछि शुक्रबारदेखि अवरुद्ध भएको सडक शनिबार साँझदेखि अस्थायी रूपमा सञ्चालनमा ल्याइएको हो।

निरन्तरको वर्षाका कारण साल्मे क्षेत्रमा करिब २० मिटर सडक भासिएपछि सोलुखुम्बुबाट काठमाडौँ तथा कोशी प्रदेशको राजधानी विराटनगरतर्फ जाने र ती क्षेत्रबाट सोलुखुम्बु भित्रिने यातायात सेवा प्रभावित भएको थियो । प्रमुख जिल्ला अधिकारी कमानसिंह थापामगरका अनुसार सडकको ठूलो हिस्सा भासिएर क्षतिग्रस्त भएपछि केही समय ठुला तथा साना सबै प्रकारका सवारीसाधन सञ्चालन गर्न कठिन भएको थियो।

जिल्ला प्रशासन कार्यालयका अनुसार सुरुमा माथिबाट आएको पहिरोले सडक अवरुद्ध बनाएपछि जेसिबी प्रयोग गरी पहिरो हटाएर यातायात सञ्चालनमा ल्याइएको थियो। तर पहिरो हटाएपछि सडकको तल्लो भाग कमजोर भई पुनः भासिएपछि सडकमा थप क्षति पुगेको प्रशासनले जनाएको छ।

सडकको तल्लो भागमा थप क्षति हुनसक्ने अवस्था रहेकाले सडक मर्मत तथा स्थायी रूपमा यातायात सञ्चालनका लागि आवश्यक काम अघि बढाउनसमेत समस्या भइरहेको प्रशासनले जनाएको छ। हाल सडक अस्थायी रूपमा सञ्चालनमा आए पनि जोखिम कायमै रहेकाले सवारीसाधन सञ्चालन गर्दा सावधानी अपनाउन सम्बन्धित निकायले आग्रह गरेको छ।