खोटाङमा खोरेत रोगविरुद्धको खोप अभियान, ६१ जना खोपकर्ता परिचालन

अशोक राई, खोटाङ | खोटाङमा खोरेत रोगविरुद्धको खोप अभियान असोज १५ गतेदेखि सञ्चालनमा आएको छ । भेटेरिनरी अस्पताल तथा पशु सेवा विज्ञ केन्द्र खोटाङको आयोजनामा जिल्लाका १० वटै स्थानीय तहमा एक महिनासम्म खोप अभियान सञ्चालन गरिने भएको हो । अभियानअन्तर्गत स्थानीय तहमा नियुक्त भएका ६१ जना खोपकर्तालाई खोपसम्बन्धी आवश्यक अभिमुखीकरणसमेत प्रदान गरिएको छ । बिहीबार दिक्तेल बजारमा आयोजित कार्यक्रममा खोप कार्य सञ्चालन, एभिस सफ्टवेयर एप्लिकेसनको प्रयोगलगायत विषयमा खोपकर्तालाई जानकारी दिइएको हो । अभिमुखीकरण कार्यक्रमको सहजीकरण पशुपन्छी तथा मत्स्य विकास निर्देशनालय विराटनगरमा कार्यरत पशु चिकित्सक पुरुषोत्तम पौडेलले गर्नुभएको थियो ।

खोरेत रोग विशेषगरी गाई, भैँसीलगायत खुरफाट्टा पशुमा देखिने संक्रामक रोग भएकाले यसको नियन्त्रण तथा रोकथामका लागि नियमित खोपलाई महत्वपूर्ण मानिन्छ । भेटेरिनरी अस्पताल तथा पशु सेवा विज्ञ केन्द्र खोटाङका सूचना अधिकारी श्रीलाल चौधरीका अनुसार पहिलो चरणमा सञ्चालन हुने अभियानमा ६ महिनाभन्दा माथिका गाई तथा भैँसीलगायत खुरफाट्टा ठूला पशुलाई खोरेत रोगविरुद्धको खोप लगाइने छ ।

खोरेत रोगविरुद्धको खोप अभियान स्थानीय तहका विभिन्न क्षेत्रमा पुगेर सञ्चालन गरिने जनाइएको छ । खोप अभियानलाई प्रभावकारी बनाउन सम्बन्धित स्थानीय तहका पशु प्राविधिक तथा पशु सेवा कर्मचारीसँग समन्वय गरिनेछ । केन्द्रले आफ्ना पशुमा समयमै खोप लगाउन तथा अभियानसम्बन्धी थप जानकारीका लागि सम्बन्धित स्थानीय तहका पशु प्राविधिक वा पशु सेवा शाखामा सम्पर्क गर्न पशुपालक किसानलाई आग्रह गरेको छ । खोरेत रोगको जोखिमबाट पशुधनलाई जोगाउन खोप अभियानमा सक्रिय सहभागिता जनाउनसमेत पशुपालक किसानलाई अनुरोध गरिएको छ ।