चिठी पुगेको जानकारी अब एसएमएसबाटै, सोलुखुम्बुमा पिआइटिएस विस्तार हुँदै

असोज १६, सोलुखुम्बु । सोलुखुम्बुमा हुलाक सेवामार्फत पठाइएको चिठी तथा सामग्रीको अवस्थाबारे सेवाग्राहीलाई जानकारी दिने प्रणाली विस्तार गर्न थालिएको छ । हुलाक कार्यालयले प्रेसकलाई आफ्नो चिठी तथा सामग्रीको अवस्थाबारे जानकारी दिने पिआइटिएस प्रणाली जिल्लाका विभिन्न स्थानीय तहमा विस्तार गरिरहेको हो । सोलुदुधकुण्ड नगरपालिका र थुलुङ दुधकाेशी गाउँपालिकामा यो प्रणाली सञ्चालनमा आइसकेको छ। थुलुङ दुधकाेशीमा यसअघि नै पिआइटिएस सञ्चालनमा ल्याइएकोमा माप्य दुधकोशीमा आज सञ्चालनमा ल्याइएको हो ।

अब नेचासल्यान र महाकुलुङ गाउँपालिकामा समेत पिआइटिएस प्रणाली सञ्चालनमा ल्याउने तयारी गरिएको छ। विश्व हुलाक दिवसको अवसर पारेर महाकुलुङमा प्रणाली स्थापना गरिने कार्यालय प्रमुख तथा निमित्त हुलाक अधिकृत शोभा नेपालले जानकारी दिनुभयो । उहाँका अनुसार हुलाक सेवामा प्रविधिको प्रयोग बढाउँदै सेवाग्राहीलाई आफ्नो चिठी वा सामग्री कहाँ पुगेको छ भन्ने जानकारी सहज रूपमा प्राप्त गर्न सक्ने व्यवस्था मिलाउन प्रणाली विस्तार गरिएको हो ।

यसैबीच १ सय ५२ औँ विश्व हुलाक दिवसको अवसरमा हुलाक कार्यालयले महाकुलुङमा विभिन्न कार्यक्रम आयोजना गर्ने भएको छ। दिवसकै अवसरमा महाकुलुङमा पिआइटिएस प्रणाली स्थापना गरिनुका साथै सोताङ र महाकुलुङका माध्यमिक विद्यालयका विद्यार्थीलाई सहभागी गराएर  हुलाक अन्तर्गत जिल्लामै पहिलोपटक अन्तरमावि स्तरीय हाजिरीजवाफ प्रतियोगिता आयोजना गरिने भएको छ ।

हाजिरीजवाफ प्रतियोगिता महाकुलुङ गाउँपालिकाको केन्द्र बुङस्थित सगरमाथा माध्यमिक विद्यालयमा आयोजना गरिने हुलाक कार्यालयले जनाएको छ । हुलाक सेवालाई परम्परागत चिठी आदानप्रदानमा मात्र सीमित नराखी प्रविधिमैत्री र सेवाग्राहीमैत्री बनाउने उद्देश्यले जिल्लाका अन्य स्थानीय तहमा समेत यस्ता सेवा विस्तार गर्ने तयारी भइरहेको कार्यालयको भनाइ छ।