असोज १९, सोलुखुम्बु । जिल्लामा अधिवेशन लड्दै गर्दा महामन्त्रीमा उम्मेद्वारी दिने घोषणा गरेका काङ्ग्रेस केन्द्रिय सदस्य आङगेलु शेर्पा सहमहामन्त्रीमा उम्मेद्वार बन्ने हुनुभएको छ । नेपाली काङ्ग्रेसको जारी केन्द्रिय महाधिवेशनमा महामन्त्रीको उम्मेद्वार बनेर जिल्लाबाट गएका नेता शेर्पाले निर्णय परिवर्तन गर्दै सहमहामन्त्रीको उम्मेद्वारी दिने हुनुभएको हो ।
उहाँले अल्पसङ्ख्यकतर्फबाट सहमहामन्त्री पदमा उम्मेदवारी दिने भएका घोषणा गर्नुभएको काङ्ग्रेस सोलुखुम्बुका सभापति नाम्गेल जाङबु शेर्पाको भनाई छ । पार्टीको १४ औं महाधिवेशनबाट निर्बाचित केन्द्रीय समितिमा समेत सदस्य रहेका शेर्पाले त्यतिबेला केन्द्रीय पर्यटन विभाग प्रमुखको भूमिका समेत कुशलतापूर्वक निर्वाह गरेका थिए ।
तीन कार्यकाल नेपाली काङ्ग्रेस सोलुखुम्बुको पार्टी सभापति भएर पार्टी संगठन निर्माणमा महत्त्वपूर्ण योगदान पुर्याएका शेर्पाले १५ औं महाधिवेशनका लागि महाधिवेशन प्रतिनिधि चयनका लागि हालै भएको निर्वाचनमा खुलातर्फ सबै भन्दा बढी मत प्राप्त गर्न सफल भएका थिए । संगठनमा जिल्लादेखि केन्द्रसम्म काम गरेको लामो अनुभव भएका शेर्पा काङ्ग्रेस भित्र अध्ययनशील र तार्किक नेताका रूपमा चिनिनुहुन्छ ।
Discussion about this post