सोलुमा सहुलियतको चामल धमाधम बिक्री, ९१९ बोरा सकियो

असोज २०, सोलुखुम्बु । खाद्य व्यवस्था तथा व्यापार कम्पनी लिमिटेड, शाखा कार्यालय सोलुखुम्बुले दसैँ–तिहारलाई लक्षित गरी सञ्चालन गरेको सहुलियत मूल्यको चामल बिक्रीअन्तर्गत हालसम्म ९१९ बोरा चामल बिक्री गरेको छ । शाखा प्रमुख निमेश कुमार यादवका अनुसार वार्षिक वार्षिकोत्सवका अवसरमा गत साउन २८ गतेदेखि सहुलियत मूल्यमा चामल बिक्री सुरु गरिएको हो । शाखा कार्यालयका लागि तोकिएको एक हजार १४० बोरामध्ये असोज १९ गतेसम्म ९१९ बोरा बिक्री भएको हो ।

बिक्री भएकामध्ये स्टिम जिरा मसिनो चामल ४०४ बोरा, अरुवा सोना मन्सुली १८१ बोरा, फोर्टिफाइड स्टिम जिरा मसिनो ३१८ बोरा र फोर्टिफाइड अरुवा सोना मन्सुली १६ बोरा रहेका छन् । शाखामा अब २२१ बोरा चामल सहुलियत मूल्यमा बिक्री गर्न बाँकी रहेको यादवले बताउनुभयो । त्यसैगरी, कम्पनीको लुक्ला डिपोका लागि तोकिएको ३८० बोरा चामलसमेत सबै बिक्री भइसकेको उहाँले जानकारी दिनुभयो । सहुलियत मूल्यमा प्रतिकिलो पाँच रुपियाँ अर्थात् प्रतिबोरा १२५ रुपियाँ छुट दिइएको छ । सहुलियतपछि स्टिम जिरा मसिनो चामल प्रतिकिलो दुई हजार १७५ रुपियाँमा तथा अरुवा सोना मन्सुली चामल एक हजार ४२५ रुपियाँमा बिक्री भइरहेको छ ।

शाखा प्रमुख यादवका अनुसार हाल गोदाममा रहेको चामलले दसैँसम्मको माग धान्न सक्ने अवस्था छ । बाँकी २२१ बोरा चामल पनि एक–दुई दिनभित्र बिक्री हुने अनुमान गरिएको छ । त्यसपछि माथिल्लो निकायबाट थप सहुलियत बिक्रीका लागि निर्देशन आएमा पुनः चामल ल्याएर बिक्री गरिने उहाँले बताउनुभयो । सहुलियतको चामल खरिद गर्न छुट्टै कागजात आवश्यक नपर्ने र सर्वसाधारणले बढीमा पाँच बोरासम्म खरिद गर्न सक्ने व्यवस्था गरिएको छ ।

चामलको दुरुपयोग तथा बिचौलियामार्फत बिक्री हुन नदिन ग्राहकको विवरण नम्बरमार्फत जाँच गर्ने व्यवस्था गरिएको शाखा प्रमुख यादवले जानकारी दिनुभयो । उहाँका अनुसार कम्पनीले वर्षभरि नै नियमित रूपमा चामल बिक्री गर्ने भएकाले हालको सहुलियतको कोटा सकिए पनि आवश्यकताअनुसार थप चामल ल्याएर बिक्री गरिनेछ ।