चार दशकदेखि सिञ्चाईको पर्खाइमा रहेका देउसालीको माग पुरा, खेतमा पानी पुगेपछि भए हर्षित

असार २, सोलुखुम्बु । हिमाली जिल्ला सोलुखुम्बुको एउटा गाउँमा योजना मागेको चार दशकपछि खेतमा पानी पुग्दा किसानमा हर्ष छाएको छ । जिल्लाको थुलुङ दुधकोशी गाउँपालिका वडा नम्बर ७ देउसाका किसानहरुले योजना मागको ४० वर्ष पछि हिउँदमा समेत खेत सिँचीत हुनेगरि कुलो आएपछि उनीहरुको मुहारमा हर्ष छाएको हो ।

मनग्य कृषि उपज उत्पादन हुने खेतमा बर्खामा जसोतसो सिंचाई हुने भएपनि हिउँदमा पानी नपुग्दा समस्या भोगेका किसान फुर्बा राईले हिउँदे खेतीको उत्पादन संगै आम्दानी बढ्ने भन्दै खुसी व्यक्त गर्नुभयो । थुलुङ दुधकोशी गाउँपालिका वडा नम्बर ७ को पहलमा हिउँदमा समेत रुग्दिको खेत सिँचीत हुनेगरि कुलो आएपछि फुर्बा राई जस्तै अन्य ५ हेक्टर क्षेत्रफलमा खेती गर्ने किसानहरूले खुसी व्यक्त गरेका हुन् ।

जलश्रोत तथा सिंचाइ विकास सब–डिभिजन कार्यालय सोलुखुम्बुबाट ६५० मिटर पाईप प्राप्त भएपछि उपभोक्ताले दुई दिनमा काम सम्पन्न गरेको समितिका अध्यक्ष हुत बहादुर कार्कीले बताउनुभयो । रुग्दि खोला सिंचाइ जल उपभोक्ता संस्थाका अध्यक्ष कार्कीका अनुसार करिब १ किलोमिटर टाढाबाट उनीहरुले शनिबार खेतमा पानी झार्न सफल भएका हुन् । जहाँ आवश्यक्ता त्यहाँ उपाय भनेजस्तै सिँचाइका लागी वडाले पहल गरिदिएपछि स्थानीयहरु आफैले जनश्रमदानबाट पाइपलाइन विस्तार देखी कुलो लगायतको अन्य संरचना निर्माण गरेका हुन ।

रुग्दीखोलाको पानी खेतसम्म आएपछि ५ हेक्टर खेतबारी हिउँदको सुख्खा याममा पनि हराभरा हुने किसानहरुले विश्वास लिएका छन । उनीहरुले पालिका अध्यक्ष असिम राई, वडा अध्यक्ष भोजराज कार्कीको नेतृत्वमा रहेको वडा समिति लगायत रुग्दीखोला सिँचाई उपभोक्ता संस्थाको पहल र सकृयाता लाई उच्च सम्मान व्यक्त गर्दै सिञ्चाइ सब–डिभिजनलाई धन्यवाद दिएका छन् । वडा अध्यक्ष भोजराज कार्कीले जो कोहीको माग भन्दा पनि आवश्यकता पहिचान गरि योजना सिफारिस गर्ने देखि आवश्यक बजेटका लागि पहल गर्ने गरेको बताउनुभयो । गत वर्ष स्थलगत अवलोकन गरि यस वर्ष काम गरिएको भन्दै वडा अध्यक्ष कार्कीले जनप्रतिनिधिको काम योजनाका लागि आवश्यक सामाग्री तथा बजेट व्यवस्था गर्ने र नागरिकले त्यसलाई उचित ढंगबाट सदुपयोग गर्दै सम्पन्न गर्ने गरेमा दीगो विकास हुने विश्वास व्यक्त गर्नुभयो।

बिभिन्न मञ्चमा बोल्ने क्रममा थुलुङ दुधकोशी गाउँपालिकाका अध्यक्ष असिम राईले सम्बन्धित वडाबाट सही योजना सिफारिस हुन नसक्दा समस्या हुने गरेको बताउनुहुन्छ । उहाँले नागरिकलाई केन्द्रमा राखेर काम गर्न निर्वाचित जनप्रतिनिधिलाई बारम्बार निर्देशन दिने गरेको गाउँपालिका प्रवक्ता भोजराज कार्कीले बताउनुभयो ।