हिमाल दर्शन माविले माघमा मनाउँदै स्वर्ण महोत्सव

साेलुखुम्बु-सोलुखुम्बुको नेचा सल्यान गाउँपालिका ३ स्थित हिमाल दर्शन माविले विद्यालयको स्वर्ण महोत्सव मनाउने भएको छ । विद्यालयले आज सम्मुखमा रहेको नयाँवर्ष २०८१ को शुभकामना आदानप्रदान तथा शैक्षिक क्यालेण्डर विमोचन कार्यक्रमका विच स्वर्ण महोत्सव मनाउने जानकारी गराएको हो । विद्यालय स्थापनाको ५० वर्ष पुगेको अवसरमा २०८१ माघ १३ गते स्वर्ण महोत्सव मनाउन लागिएको जनाइएको छ । महोत्सव आयोजनाका लागी विद्यालय व्यवस्थापन समिती अध्यक्ष ओम प्रसाद बास्तोलाको अध्यक्षमा आजै ५१ सदस्यीय महोत्सव मूल आयोजक समिति समेत गठन गरिएको छ । यस्तै सोही कार्यक्रममा विद्यालयको वार्षिक शैक्षिक क्यालेण्डर विमोचन गरिएको पनि बि.व्य.स अध्यक्ष ओम प्रसाद बास्तोलाले जानकारी दिनुभयो । यसैबीच कार्यक्रमका प्रमख अतिथि तथा नेचा सल्यान गाउँपालिकाका अध्यक्ष धनजन राईले नयाँ वर्षको शुभकामना व्यक्त गर्दै विद्यालयले मनाउन लागेको स्वर्ण महोत्सवमा स्थानीय सरकारको तर्फबाट पुर्ण सहयोग रहने बताउनुभएको छ । शुभकामना आदानप्रदान तथा शैक्षिक क्यालेण्डर विमोचन कार्यक्रममा गाउँपालिका उपाध्यक्ष विना राई, पालिकाका ५ वटै वडाका वडाअध्यक्षहरू, विद्यालयका संस्थापक सदस्य बलराम बास्तोला, ६ वटै मा.विका बि.व्य.स अध्यक्ष तथा प्रधानाध्यापकहरू, पूर्व शिक्षक, संस्थापक सदस्यका परिवार, विद्यार्थी अभिभावक लगायतको उपस्थिति रहेको थियो ।