विक्रम सम्वत् अनुसार आजबाट २०८१ सुरु, हर्षोल्लासका साथ मनाइदै

साेलुखुम्बु – आज नेपालीहरूको नयाँ वर्ष (२०८१ काे पहिलाे दिन) अर्थात पात्रो फेरिने दिन । आज देशभरिनै हर्षोल्लासका साथ नयाँ वर्ष मनाइदै छ । हिमाली जिल्ला सोलुखुम्बु सहित देशभरिनै आज बिभिन्न तवरले नयाँ वर्षको स्वागत गरिदै छ ।  आजको दिन गएको वर्षभरि भएका राम्रा नराम्रा उतारचढावलाई समीक्षा गर्दै आउने साल सुखद होस भन्दै नयाँ वर्षको पहिलो दिनलाई मनाइदै छ ।

विक्रम सम्वत् अनुसार नेपालमा आजबाट २०८१ साल सुरु भएको छ । पहाडी, मध्य पहाडी भेग अनि हिमाली भेकमा पनि उत्साहका साथ मीठो खाएर, राम्रो लगाउँदै नयाँ वर्षमा उत्साह–उमङ्ग साटासाट गर्दै मनाइदै छ । वैशाखका सुरुवाती दिनहरूमा भएका अनि गरेका कुरा वर्षभरि दोहोरिन्छ भन्ने विश्वास राखिन्छ । अनि यी सुरुवाती दिन मीठो खाने, राम्रो लाउने अनि सकारात्मक विचार ल्याउने दिनका रूपमा लिदै यि दिनहरूलाई सकेसम्म सकारात्मक बनाउने प्रयास गरिन्छ । तराईमा आजको दिनलाई सिरुवा पर्वको रुपमा मनाइन्छ भने  पूर्वी तराईमा जुडशीतल भनेर एकअर्कामा पानी छ्‌यापेर मनाउने चलन छ ।

काठमाण्डु उपत्यका सहित भक्तपुर तथा ललितपुर क्षेत्रमा आज धार्मिक तथा सांस्कृतिक तवरले नयाँ वर्ष मनाइँदै छ ।  पहाडका खेतबारीमा छरिएका अन्नपातहरू मकै गहुँ चराहरूले नखाउन् भनेर बुख्याँचा राख्ने चलन र बुख्याँचा बनाउने समय र नयाँ वर्षको उत्साह लगभग एकै समयमा पर्छ । नयाँ वर्षमा बालबालिका तथा युवायुवतीहरू पर्यटकीय तथा रमणीय क्षेत्रहरु घुम्न जाने, रमाइलो गर्ने योजना सहित बिहानै देखी तादम्यता मिलाई रहेका छन । आज रेडियो, टिभि, पत्रपत्रिका सबैतिर नयाँ वर्षको शुभकामना छाएका छन् ।