नेचासल्यानका ३९ उत्कृष्ट कृषक पुरस्कृत

असार ७, सोलुखुम्बु । सोलुखुम्बुको नेचासल्यान गाउँपालिका ३९ जना कृषकहरुलाई पालिकाले उत्कृष्ट कृषक पुरस्कार प्रदान गरिएको छ । शुक्रबार आर्थिक विकास समिति संयोजक एवं नेचासल्यान गाउँपालिका वडा नम्बर २ का वडा अध्यक्ष सिताराम काफ्को अध्यक्षता तथा नेचासल्यान गाउँपालिका अध्यक्ष धनजन राईको प्रमुख आतिथ्यतामा पालिका भित्रका ३९ जना उत्कृष्ट कृषकहरुलाई पुरस्कार प्रदान गरेको हो ।

नेचासल्यान गाउँपालिका कृषी शाखाकाको चालु आर्थिक बर्ष २०८०÷०८१ को बार्षिक स्वीकृत कार्यक्रम अन्तर्गत कृषि फर्म समुह मध्ये उत्कृष्ट भएका प्रथम, द्वितिय, तृतिय हुने किसानहरुलाई क्रमश : ४० हजार, ३० हजार र २५ हजारको साथमा प्रमाण पत्र प्रदान गरिएको छ । यस्तै पशु फर्म समुह मध्ये उत्कृष्ट भएका प्रथम, द्वितिय, तृतिय र चौथो हुने किसानहरुलाई क्रमश : ३० हजार, २५ हजार र २० हजारको साथमा प्रमाण पत्र वितरण गरिएको छ, भने अन्य कृषकहरुलाई प्रोत्साहन स्वरुप १५ हजार रुपैँयाको साथमा प्रमाण पत्र हस्तान्तरण गरिएको गाउँपालिकाले जनाएको छ ।

नेचासल्यान गाउँपालिका अध्यक्ष धनजन राईले पालिका भित्रका किसानहरुको बजारिकरणका लागि सहज हुने उदेश्यले कृषि एम्बुलेन्स सञ्चालनमा ल्याएको बताउनुभयो । साथै आगामी दिनहरुमा कृषकहरुको आवश्यकतालाई मध्यनजर गर्दै ट्याक्टर मेसिन खरिद गर्ने योजना रहेको बताउनु भयो ।

यस्तै गाउँपालकाकी उपाध्यक्ष विना राईले पालिका भित्र प्रशस्तै तोरी खेती हुने सम्भावना भए पनि आयातित तेल बढी प्रयोग भइरहेको भन्दै आगामी दिनहरुमा किसानलाई तोरी खेति तर्फ प्रोत्साहन गर्ने उल्लेख गर्नुभयो ।

नेचासल्यान गाउँपालिकाका निमिक्त प्रमुख प्रशासकिय अधिकृत युवराज पोखरेले उत्कृष्ट भएका किसानहरुलाई थप उर्जाका साथ व्यवसायमा लाग्न आग्रह गर्नुभयो । नेचासल्यान गाउँपालिका कृषि शाखाकी प्र्रमुख सोबिता बास्तोलाले उत्कृष्ट किसान छनौटका लागि कृषि फार्ममै पुगरे अनुगमन गरी छनौट गरिएको बताउनुभयो । आगामी दिनहरुमा किसानहरुका लागि कृषि शाखाबाट सक्ने सक्दो सहयोग गर्ने प्रतिबद्वता व्यक्त गर्नुभयो ।