सगरमाथाको काखमा रहेको खुम्बु पासाङल्हामु गाउँपालिकाले ल्यायो ७५ करोड बढीको बजेट

असार १०, सोलुखुम्बु । हिमाली जिल्ला सोलुखुम्बुमा पर्ने विश्वको सर्वोच्च शिखर सगरमाथाको काखमा रहेको खुम्बु पासाङल्हामु गाउँपालिकाले आगामी आर्थिक वर्षका लागि ७५ करोड ४५ लाख रुपैयाँको बजेट ल्याएको छ ।

आर्थिक वर्ष २०८१/०८२ को नीति तथा कार्यक्रम कार्यान्वयन गर्न ७५ करोड ४५ लाख रुपैयाँको बजेट ल्याएको हो । आर्थिक वर्ष २०८०/०८१ मा गाउँपालिकाले ६२ करोड, ६० लाख, ८६ हजार रुपैयाँको बजेट ल्याएको थियो । आर्थिक वर्ष २०८०/०८१ को तुलनामा २०८१/०८२ मा खुम्बुले बजेटको आकार बढाएको छ ।

चालु खर्चतर्फ २९ करोड ७९ लाख ७४ हजार ३ सय ५८ रुपैयाँ अर्थात् ३९.४९ प्रतिशत र पुँजीगततर्फ ४५ करोड ६५ लाख २५ हजार ६ सय ४२ रुपैयाँ अर्थात् ६०.५१ प्रतिशत रहेको छ । यसै गरी आर्थिक विकासतर्फ ४ करोड ३५ लाख २८ हजार विनियोजन गरिएको छ । सामाजिक विकासतर्फ १९ करोड ७९ लाख २७ हजार ५ सय ७६ रुपैयाँ, पूर्वाधार विकास ३६ करोड ९४ लाख ६० हजार, वन वातावरण तथा विपत् व्यवस्थापनको क्षेत्रमा १ करोड ९५ लाख, सुशासनतर्फ ३ करोड २५ लाख र कार्यालय सञ्चालनतर्फ ९ करोड १५ लाख ३६ हजार विनियोजन गरिएको गाउँपालिकाले जनाएको छ ।

खुम्बु पासाङल्हामु गाउँपालिकाले आगामी आर्थिक वर्षमा पर्यटकीय पदमार्ग, विद्युतिकरण, प्रभावकारी कानुन कार्यान्वयनलाई उच्च प्राथमितामा राखेर बजेट ल्याइएको  गाउँपालिकाले  जनाएको छ ।