विपद्को सामना गर्न सोलुमा ३ सय ५० प्रहरी तैनाथ

असार १०, साेलुखुम्बु । मनसुन शुरु भएसँगै हुन सक्ने संभावित प्राकृतिक प्रकोपलाई मध्यनजर गर्दै हिमाली जिल्ला सोलुखुम्बुमा ३ सय ५० जना प्रहरी तैनाथ गरिएको छ ।

विपद्को  पुर्व तयारी स्वरुप सबै जिल्लामा कार्यरत प्रहरीहरुलाई सतर्क अवस्थामा राखिएको जिल्ला प्रहरी प्रमुख तथा प्रहरी नायब उपरीक्षक द्वारिका प्रसाद घिमिरेले बताउनु भयो ।
जिल्ला प्रहरी कार्यालय, ३ वटा ईलाका प्रहरी कार्यालय र बाँकी प्रहरी चौकी समेत गरि ४२ वटै प्रहरी युनिटहरु तैनाथ गरिएको छ । बाढी-पहिरो तथा अन्य संभावित प्रकोपका लागि सूचना सम्प्रेषण, उद्धार, राहात र सहयोग संकलनमा परिचालित हुने डिएसपि घिमिरेको भनाई छ ।

यो पटकको मनसुनमा विगतका वर्ष भन्दा अलि फरक ढंगले द्रुत गतिमा प्रहरीहरु परिचालन हुने र तत्कालै उद्धार अनि राहातको काम हुने डिएसपि घिमिरे दाबी गर्नु भयो । जिल्लामा विपद् मा नेपाली सेना, नेपाल प्रहरी र सशस्त्र प्रहरी समेत परिचालित हुनेछन् ।