रावाबेसीका २ वडामा आज र भोली विद्युत आपूर्ति बन्द 

साेलुखुम्बु – खोटाङको रावाबेसी गाउँपालिकामा आज र भोलि २ दिन विद्युत आपुर्ति बन्द हुने भएको छ । नेपाल विद्युत प्राधिकरण दिक्तेल वितरण केन्द्रले एक सूचना जारी गर्दै बैशाख ३ गते र ४ गते २ दिन रावाबेसीको खार्पा र लामीडाँडा क्षेत्रमा विहान ८ बजे बाट साँझ ५ बजे सम्म दैनिक ९ घण्टा विद्युत अवरुद्ध हुने जनाएको हो ।

हलेसी फिडरबाट वितरण हुने उक्त क्षेत्रमा विद्युत प्रसारण लाइनको मर्मत तथा सुधार गरिने भएकाले विद्युत सेवा अवरुद्ध हुने वितरण केन्द्र कार्यालयका प्रमुख शोभित बहादुर बस्नेतले बताउनुभयो । उक्त क्षेत्रको विद्युत प्रसारणलाइनमा रहेका ट्रान्सफर्मरको अर्थिङ तथा ११ के.भि लाइनको मर्मत कार्य गर्नुपर्ने भएकाले विद्युत आपुर्ति बन्द हुने उहाँको भनाई छ ।  

बर्खायाममा चट्याङ लगायत अन्य दुर्घटना तथा विपत्तिको जोखिम न्यूनिकरणका लागी  कार्यालयले पूर्वतयारी गरिरहेको पनि उहाँको भनाई छ ।  मर्मतको काम सम्पन्न भए जुनसुकै समयमा पनि विद्युत आपुर्ति सुरु हुने कार्यालयले सूचनामा उल्लेख गरेको छ ।