छुरा प्रहार गरि हत्या गर्ने ३ जना युवक प्रहरीको फन्दामा 

साेलुखुम्बु – खोटाङमा छुरा प्रहार गरि हत्या गर्ने ३ जना युवकलाई प्रहरीले पक्राउ गरेको छ ।  खोटाङको दिक्तेल रूपाकोट मझुवागढी नगरपालिका वडा नम्बर ११ खार्मीमा गत बैशाख १ गते नयाँ वर्षको दिन सोही वडाका ३० वर्षिय धनजित राई माथि छुरा प्रहार हुँदा घटना स्थलमै मृत्यु भएको थियो । सो हत्यामा संलग्न ३ जना युवकलाई प्रहरीले सोमबार बिहान ८ बजेर ३३ मिनेटमा  पक्राउ गरेको हो ।

उनीहरूलाई जिल्ला प्रहरी कार्यालय खोटाङबाट प्रहरी नायब उपरीक्षक पुरुषोत्तम खड्काको कमान्डमा खटिएको प्रहरी टोलीले सोही नगरपालिका वडा नम्बर १० पाथेका भसुन्डाका धनपति राईको घरमा लुकिछिपि रहेको अवस्थामा फेला पारि पक्राउ गरेको थियो  ।

पक्राउ पर्नेमा दिक्तेल रूपाकोट मझुवागढी नगरपालिका वडा नम्बर ११ खार्मीका २२ वर्षीय विकास राई, २० वर्षीय आशन राई र २८ वर्षीय गणेश राई रहेका छन । उनीहरूलाई मृतककी श्रीमती कविता तामाङ राईको जाहेरीका आधारमा पक्राउ गरिएको जिल्ला प्रहरी कार्यालय खोटाङका प्रहरी निरीक्षक बेनु कार्कीले जानकारी दिनुभयो ।

प्रतिवादी तिनै जनालाई पक्राउ गरि कर्तव्य ज्यान मुद्दामा अनुसन्धान भइरहेको प्रहरीले जनाएको छ । मदिरा सेवान गरि झैझगडा गरिरहेका उनीहरूलाई छुट्याउन जादा मृतक राईमाथि उल्टै छुरा प्रहार गरि ज्यान लिएका थिए । 

याे पनि पढ्नुहाेस…..

नयाँ वर्षकै दिन खोटाङमा छुरा प्रहारबाट १ को मृत्यु